Bi rishitho “U Leşono emhoyaydan ı ıthuthaydanyo” frısle u Mawtbo Umthoyo d’Bethnahrin buyono bi cohnutho du yawmo du leşono Emhoyo

BRITHO – Frısle u Mawtbo Umthoyo d’Bethnahrin buyono bi cohnutho du yawmo du leşono Emhoyo. Bi rishitho “U Leşono emhoyaydan ı ıthuthaydanyo” i Sictho di Rişonutho d’MUB kımmo:

——— Buyono Mawtbo Umthoyo d’Bethnahrin ———

U LEŞONO EMHOYAYDAN İ İTHUTHAYDANYO

U leşono emhoyo Suryoyo du camaydan, ha ma leşone qamoye di kthawto dkıtwo b’Bethnahrin u bu Madenho Mescoyo’yo. Mi celtho dhawile dawro ba esore dbayn da came bu maktabzabno, qmırle monoyutho awkith jawhar catiro. Elo cal du camaydan dımvayacle i şalitutho siyasi wu statüyayde, u leşonaydan’ste cabır tahtu tathir d’mardwotho u dımdabronwotho d’hakome frişe, u camu zabno u cudrono dımqadamle la esore di cyeşe du kenşo’ste hawın mhile. Mawxa i nısbe du qroyo u di kthawto du leşono emhoyaydan u Suryoyo’ste, fayış mtahmo cam falqo ciqo. Calathe u leşono emhoyaydan, bılhude cal dmawdıc xıd leşono di cito, bu şıkılano i hiyoyutho umthoytaydan wi haymonutho tawdithoytaydan’ste hşiwi xıd hdode.

A hayle hakome du statüko du Madenho Mescoyo cal dıhzelın u camaydan xıd knuşyotho awkith jamacat tawdithoye, mankarre i hiyoyutho umthoytaydan. A hayle hakome Araboye, Turkoye, Farsoye camgabıd dıkmaşın siyase du tenkiro u du lhoyo mqabıl du camaydan, bu şbilo du yulfono du tefşiro awkith du asimilasyon’ste mnıclın u leşonaydan u ftıhlın darbo lu tcoyayde. Elo bu maşıqlo haroyano bu shofo da mdabronwotho du Baas bu Iraq u b’Suriya, wi morutho dkıtwola i dawle da Mollawiye du İran cal dmadcafla bu qlimo, a şartat di cyeşe du camaydan’ste mşahlıfi. Cama şuşote dathın lu hwoyo bu Madenho Mescoyo, camgabıd drawıh u haqlo di mmathlonutho du camaydan, bdarğo baynothemwothoyo’ste mşarele dmınqoşi a zedqe folitiqoye u marduthoyayde. Bu asasano mqabıl da siyasat du tefşiro u du tetciyo du leşono emhoyaydan’ste, bi idactho di mşalutho umthoyto klozım dmaqwena zıttır u ağunaydan. Calathe u darbo du texliso du leşono emhoyaydan ma tahlukat u mu nfoqo di şroluthayde, bu rişo b’Lebnon, b’Suriya, bu Iraq u bkul duktho dkito mkone, klozım dmıftıh şutose dkobın yulfono bu leşono Suryoyo. Dilonoith mqabıl di zihniye du yulfono di Araboyutho u di Turkoyutho, klozım dmafıtina u şbilo du yulfono umthoyaydan la haye. Me gabo hreno klozım dmaydina tedbire mqabıl di tahluka du tefşiro dkito calu leşono emhoyaydan bi golutho’ste.

U ağuno di hirutho dıkmitahwe bi rişonutho du Mawtbo Umthoyo d’Bethnahrin, bcayni zabno ağuno du nfoqo du moro di mardutho, du leşono u da timoyothaydan a maktabzabnoye’yo. Laşan naqlahreto dmamtena u leşonaydan l’aykanoyutho caşınto, bu qufoyo awkith b’seferberlik du yulfono u du tewlifo klozım dsaymina harake. Bnişo dmınfıq moro lu leşono emhoyo, a şutose, a nahire, a malfone wa farsufe du camaydan kulle, bfusqono kamilo klozım dmıstafdi ma fırsat dıknıfqi bu maşıqlano. Calathe laşan du leşono emhoyaydan dhowe leşono ruşmoyo du yulfono bu athraydan, olsoyoyo dmısnıd u ağuno dkobina. U teqbilo du talabaydan du leşono emhoyo, wu myodayde tahtu garanti du nomuso esonoyo, bcayni zabno u teqbilo di hiyoyutho umthoyto du camaydanyo. Bu asasano bi ohnutho d’21 Şbot du yawmo du leşono emhoyo dı britho, kımhanena u ağuno du tecişo u di mşawşıtonutho du leşono Suryoyo da malfone, da yolufe u du camaydan.

Tihe lu leşono emhoyaydan dkıtyo i ithuthaydan.

Tihe lu ağunaydan du leşono emhoyo Suryoyo.

Mawtbo Umthoyo d’Bethnahrin

Sictho Rişonutho

20.02.2025

——— Huthomo Buyono Mawtbo Umthoyo d’Bethnahrin ———