BİDEN EGARTHO Lİ KONGRE-CUQOBE NOQUFE İRAN

Lfuth u Qusro Heworo, a Noture du Qawmo du İran mtayablın şişaltho d’hçome cala folhe Amerikoye ucala nuqazyothathe dkıtne b’Suriya ubu Cıraq. U xıd funoyo la hçomani’ste, sımlın a folhe Amerikoye cuqobe frişe cal nuqazyotho u cambare da hayle İranoye uda noqufathe dkıtne b’Suriya ubu Cıraq.

A hçomani’ste mşarewolın, bıthır mu qrobo dmabde beyn İsroyel-dkıtyo muttafik d’Amerika udu zawco d’Hamas dıkmısnıd mu İran uma muttafikayde. Cali aykanoyuthathe’ste, maslamle athmıl u rişono Amerikoyo Joe Biden egartho li kongre u m’akadle eba, da cuqobani kmisomi lfuth u mluwo du qonuno da 93-148 dkito beyn da hayle dkıtne b’qrobo.

U rişono Amerikoyo m’akadle du nişo du fusqonayde, dımhafıd u dımdafıc a folhe Amerikoye dkıtne bu qlimo’yo leşan dqudri dımdawmi a cuqobathe dımbayni’wo bu amro dhıwo ba 2001 lu ağono mqabıl di marhıbonutho. A cuqobani kmisomi’ste leşan dmitaklın a hçome da noqufe du İran cal Amerika ucala hayle bnayqyomo dkıtne b’Suriya ubu Cıraq u dlo mitahwelın aftho dmaqwın ruhaye zıttır bu qlimo’yo.

Elo athmıl naqla hreto sim 4 naqlat hçome cala dukotho da Amerikoye bu Cıraq u b’Suriya. A hçomani’ste simi bu mhoyo da soruhe uda tayosyotho dlo pilote elo lo hiw husrono-lo la folhe u loste la bınyone dkıtne ba nuqazyotho d’Amerika.

Lfuth i Mşatasto da zedqe noşoye, me 19 bu yarho dşafıcina uholucdo, sim 10 hçome cala nuqazyotho d’Amerika b’Suriya. Bu Cıraq’ste taqriban cayni mınyono’yo u athmıl mhelın a noqufe du İran bu Cıraq bi nuqazto d’Amerika dkıtyo b’Arbil.