Bıthır mu funcomo b’Rusya mahwele Putin gfoyış hol la 2036 rişono du athro

U funcomo dımşarewole 25 bu yarho d’Hziron u dkamıl athmıl, u nişayde dmitahwe fusqono du şuhlofo du nomuso esonoyo du athro, dkobe fsoso lu rişono Vilademir Putin dfoyış bi rişonutho holi şato da 2036.

 Lfuth a kunoşe qamoye, kmitamır 73 ba mo du camo kımaqbıl dhowe u şuhlofano bu nomuso esonoyo d’Rusya.

 Bu funcomano dımşarewole 25 bu yarhano dıfayıt hzırin kamıl athmıl ha bu yarhano da şwac, dımşrelın bu bunoyo da qole du camo dhulın u qolathe bu funcomano. Bgawe du funcomano kito 3 sıbwotho du camo gıdobe u qoleyde aclaye hıdo masıbwotho du rişathro Vilademir Putin kibe minaqa tarte dawrat hrene li rişonutho du athro, wi sbutho hreto u qonuno du zuwoğoyo du şuwoğo b’Rusya me athto u gawroyo, u lo mede hreno wi sbutho hreto dkul zabno mitazıd u ağro awkith u mcaş da mşawtbe.

Lfuth u bnoyo qamoyo da qole dhawi kmahwe 73 bamo mu camo hule u qoleyde dmitaqıbli a 3 sıbwothani. En hawxa dfayşi a qole inaqayo u rişono Putin kowele mkono dminaqe tarte naqat hrene li rişonutho bu şuklano kibe foyış u rişono du athro hul li şato da 2036.

Metul du şuhlofo dıgmisim bu nomuso esonoyo a ışne d’Putin fayış rişono hul ucdo kmılhoyi mawxa me hatho kibe minaqe tarte naqat hrene. Metul kul dawro di rişonutho du athro d’Rusya,ya 6 ışneyo, Putin ucdo dkıtyo yatiwo calu kursyo di rişonutho kıtle hol li şato da 2024, bıthır mathe inaqa dhowe ğuboye kibe mraşıh ruhe naqa hreto laşan 6 ışne hrene.

A farsufe saqıbloye d’Rusya lıkmaqıbli a ğuboye du funcomano metul dkımi Putin ksoyım hboso calu camo u latyo demoqaratoyo u funcomano.