Blinken mawdacle d’Turkiya hıdo ma tlotho athrawotho qamoyeyo dıkmahto a gelyunore ba hbuşye

U waziro di baroyutho d’Amerika Anthony Blinken sımle mamlo la gelyunore bu yawmo Emwothoyo di Hirutho du Tboco froso.

 Bu mamlayde Blinken kali cala msoke, cala rdufye u calu cnufyo dıkmisım mqabıl da gelyunore bı britho u mırle; Turkiya, ha ma tlotho athrawotho rişoye dbritho’yo, dıkmahto a gelyunore ba hbuşye.

U waziro di baroyutho d’Amerika Anthony Blinken mbahasle calu taşroro haroyo da 2020 dfrısle u Komisyon du Sutoro da Gelyunore u mawdacle, d’Turkiya, u Sin u Mısır, kothın bi qamayto di lohitho dan athrawotho dıkmahti a gelyunore ba hbuşye. A 3 athrawothani’ne, kıtte u mınyono celoyo da gelyunore ba hbuşye lfuth i şato dşafıcina.

U waziro Amerikoyo di baroyutho mırle; Lfuth u Komisyon du Sutoro da Gelyunore, u mınyono da gelyunore dmahti ba 2020 ba hbuşye mcal fothe da fulhone dıkmaşın, matın l’darğo ğalabe celoyo, mu zabno dmabdele u Komisyonan a fulhonayde du qeyodo da rdufye dıkmisomi cala gelyunore.

Bu mamlo dsımle athmıl Blinken bu yawmo di Hirutho da Gelyunore mawdacle, lfuth a buhone dsımle u Komisyonano mahwe du Sin, d’Turkiya u Mısır-an athrawotho rişoye dıkmahti a gelyunore ba hbuşye’yo. Ğalabe gelyunore b’Turkiya kmımsoki cal dıkmnasın dmaglın cala dyoşe dkowe cala zedqe noşoye.

Bu yarho d’Konun u qamoyo dşafıcina, msıkwo mınyono rekord d’gelyunore u mahtiwo ba hbuşye cala fulhone dsımlın ba 2020 wu Sin kothe bi qamayto, bıthır Turkiya u bıthır mena’ste Mısır. U Huyodo da gelyunore b’Turkiya mawdacle, da botaydino hkımlın a gelyunore kulle camhıdode l’226 eşne hbuşyo bi şato haraytathe.

Mahıtste mnoco dmıfrıs 1.411 mimrotho me 62 mabuce frişe u camathe’ste 13 tebe dmaqimi mu nawlo wa neşe gelyunore’ste kmidoşi bu zyodo. Me gabo hreno griş u zuhoro cali aykanoyutho da gelyunore b’Suriya’ste u mawdıc dhol 700 gelyunore msiki u mahti ba hbuşye du athro.