Brahim Murad sımle qrayto la fulhone mhayde du snodo lu cameydan

U rişono du gabo du huyodo Suryoyo tibeloyo Brahim Murad hule maqırhonutho lu tboco froso cali aykanoyutho di mcadronutho d’lu cameydan d’Lebnon.

Bi maqırhonutho Murad kali cala gabe u şutose aw citawotho du cameydan dsaymi cam hıdode awyutho metul dkito sniqutho rabtho li mcadronutho.

Brahim Murad bi qamayto mahkele cali tarmitho da gabe u şutose du mawtbo umthoyo d’Bethnahrin dımşaryolın u sımlın tarte tahrazyotho b’Suroyo TV du camo mahwele lhiqutho rabtho di mcadronutho lu cameydan d’Lebnon.

İtarmithathe dımahıt ışme me Lebo l’Lebo dımfarıq hul 400 sale d’muklone u xer sniqwotho du camo b’Zahle b’Bayrut gdımdawmo ba dukotho dlımte lınne.

Murad bi mawdconutho mırle ahna kudcina lı matina lu cameydan kule dkıtyo sniqoyo elo  gıdmnasina dmotina la yaqrotho dkıtlın sniqutho du muklo u ğer.

U rişono du gabo d’USUP Brahim Murad mırle. En kul ha menan kul gabo u şutoso dsoyım mcadronutho l’ruhe lı motina li netice dkıbcina qay lo a gabe wa şutose wa citawotho dkıtne bkul karxutho lıtmi lıhdode u mbayni tahrazto cam hdode di mcadronutho du cameydan inaqayo kiban maydina fire tawe.

Murad komır ğalabe farsufe athın tlıblın mcadronutho l’futh da mkone dkıtlan lı madcarlan noşe, bu zabno du cedano dothelan i mcadronutho trayonitho dı malimo gıdmalıhqina hın mene lı Trablus dı tlib mcadronutho.

U rişono bi maqırhonuthathe sımle qrayto dilonoyto lu cameydan u suryoyo d’Lebnon u komır: ktılbina mu cameydan u lebnonoyo dkıtyo bi golutho kıbcina dhozina a ışmonathxunste ba listat di mcadronutho.

Sbutho hreto dkobacno domarnola u cameydan u suryoyo dı Turcabdin hiyeyo u dinamo da mcadronwotho  hathe şroluthoyo, ahna lıksaymina furşono bayn u cameydan da coğrafiyat. Kıbcina kuleyna dhowina cam hdode u mahtina ido b’İdothe dıhdode u sındina hdode bkul maşıqlo.