Britania mabdela cuqobe mqabıl da ğurube marhıbone Dacış
Britania dkıtyo bu koalisyon Emwothoyo dkıtyo bi rişonutho d’Amerika, mabdela naqla hreto a cuqobayda cala ğrobe marhıbone d’Dacış bu Iraq.
İ şultonutho d’Britania, maklewola a cuqobani dcal Dacış bu yarho d’İlül da 2019.
Bi maqırhonutho dhuwla i şultonutho d’London d’Britania bi dafayda du nawlo m’akadla, dmabdela naqla hreto a cuqobayda cala ğrube marhıbone d’Dacış, bıthır mıd maklanwo bu yarho d’İlül dı şafıcina. İ şultonutho mawdacla, d’2 tayosyotho d’Tyfoon, sımlın cuqobe oyaroye casye bu garbyo du Iraq leşan u snodo da hayle di naşfe du Iraq
A 2 tayosyotho d’Tyfoon, bu snodo da tayosyotho d’RAF, mqafelın a bınyone da ğrobe marhıbone dkıtne bıdukotho casye bu macırbo d’Tuz Xurmato dıkhoye eba hem Caraboye, Kurdoye u hemste Turkmanoye. U bınyonanoste, malyowe marhıbone, mşale u rişone folhoye wa tayosyotho baroyo mfarqaclın u qentrunano.
İ şultonutho mırla; Bıthır mu mhoyanoste, tayosyotho dılo pilote sımlın cuqobo u m’akadlın, da soruhe dmafiri mhelın baroyo bu nişo u noşo lo maxlasle mene, ubi netiçe maqım mınyono d’marhıbono mi holo du qrobo. Tuz Xurmatu, fnitho dkito qale aclayo u hem Arbil u hemste Boğdod kımawdıci dkıtyo cayıd dıthe.
A hayle Iraqoye mıdwolın i mşalutho dcali mdito bu yarho d’Teşrin u qamoyoda da 2017 bıthır mıd a hayle di peşmerge jıbiriwo dmıgroşi mena bıthır mıd sımwo u funcomo di şaryutho du qlimo d’Kurdistan. Ğalabe ma dukothani du garbyo du Iraq dkito şwolo aclaye beyn da 2 şultonwotho, kıhoye ebeye u camaydan, Ezidoye, Kurdoye, Caraboye, Turkmanoye u Şabak.