Bu athro d’Libya qtil 16 folhe Turkoye

A’haylawotho du madınho d’Libya awkith a’haylawotho noqufe du rişono du gayso athronoyo d’Libya Xalifa Haftar, mawdaclın dıqtilın 16 folhe Turkoye ba qrobe dhawınwo ba kmo şabe dşaficina. Camgabıdathe, u gayso athronoyo d’Libya mawdacle dmahıtle ido cal Zayne u alat folhoye dımşadri m’Turkiya lu athro d’Libya bu darbo du lmino d’Misrata.

U malolo du gayso athronoyo d’Libya Xaled Almahjub, bi maqırhonutho dhule lu tboco froso mawdacle da haylawotho d’Xalifa Haftar qtilın 16 folhe Turkoye ba kmo şabe haroyani, baynothaye dıqtili bi mditho d’Misrata dıknıflo calu yamo, ubaynothayeste dıqtili ba qrobe dhawın b’Tarablos ubi qastra d’Alfalah dıknıflo bu tayımno di erişkoyto.

U rişono du rejim dı Turkiya Receb Tayib Erdoğan, bu mamlo dsımwole lumıhreno mıctarafwole da haylawotho Turkoye hzelın husrono di nafşo b’Libya. Erdoğan dlımathkarwole u menyono da folhe Turkoye dıqtili mırwole “ahna b’Libya na ba folhaydan uba grubaydan du gayso athronoyo d’Suriya. Ahna kımdawmina u mrodo tamo. Kıtlan menyono d’sohde, elo bcayni zabno mahıtlan 100 ma haylawotho d’Haftar nişo elayna”.

Camgabıdathe, u malolo du gayso athronoyo d’Libya Ahmad Almismari makadle da grube du duyoqo uda n’istixbarat mahıtlın ido cal zayne u alat folhoye dımşadri m’Turkiya lu athro d’Libya bu darbo du lmino d’Misrata. A’zaynani mşadrila Turkiya bnişo dmaqwın u haylo da tukose marıhbone uda jatawiye mzayne dkıtne bi fnitho du macırbo d’Libya. Almismari dıgrışle u zuhoro calu snodano dkıtyo dyoşo li şalyuthzayno, mawdacleste du nqolo da zayne m’Turkiya kmisım b’şıkıl ftiho qum d’caynothıd du kenşo emwothoyo.

Almismari mırleste “bıthır mıdmahıtle u gayso athronoyo d’Libya ido calu lmino dı Tarablos, u nqolo du zayno m’Turkiya mşahlıf lu lmino d’Misrata. Ahna ksaymina ucdo duyoqo la lmine kulle, laşan dlımınqıl zayne la grube marıhbone. U nfoqo dı Turkiya wa marıhbone m’Libya şartyo dhowe şalyuthzayno kamılto bu athro”.