Bu athro du Swed b’zabno dı tloth şabe qtil 5 neşe

Hamış neşe qtili belhude ba tloth şabe haroyani ma gawrathe bu Swed. İ sbuthatheste xlıqla hfuxye beyn da gabe frişe du athro u mıdlaste duktho rişoyto bu tboco froso du Swed.

Calu cnufyo ucalu qatlano da neşe, tlib ucdo mi wazırto di Şawyutho du Swed, dmaqşıyo u msombrişo u çazza da hayobe.

Bu zabnano dıkmdawım u virus di Corona, fris tebe b’dafe frişe calu cnufyo dzayıd u dqaşi mqabıl da neşe b’britho. Bi sbuthathe’ste mbahıs cal mathlo-Turkiya dqtil 25 neşe bu athro-mu zabno du rişqutno mawfaqle u athro mu qyomo d’Stanbul dkıtwe mqabıl du cnufyo dıkmisım cala neşe ucala zedqathe.

Elo bu athro du Swed’ste mıdla i sbuthathe duktho bu yawmoyo uhani kmo yawme, kmıgrış u zuhoro calu qatlo da neşe u mawdıc, belhude ba 3 şabe haroyani, qtil 5 neşe wi sagiyoyuthathe’ste ma gawrathe qtili. Calathe mahwe hfuxyo u gabe frişe bı qaşyutho krıhlın u cnufyano dzayıd cala neşe. A gabani’ste u sımlın qroyto li wazırto di Şawyutho Märta Stenevi dmahto tedbire casye leşan dmıkle qum du cnufyano.

İ wazırtoste m’akadla cali ulsoyutho du şroyo du qetrano u tlıbla ytawyotho cama gabe kulle bnişo dmiqafele şroyo. Stenevi mşadarla athmıl zminutho la rişone d’gabe leşan dmıdrış mın tedbire kibe dmimıd u mın şıkıl çazza kibe dmitahwe la hayobe u mın kibın dsaymi leşan dımşahlıfi u qedomano da gawre.

U waziro di gawoyutho’ste krıhle u cnufyano  u mawdacle, dmaqşelın ışmo u msombrişo u dımbayanlın 350 farsufe leşan dsaymi buhone camu polis bi sbuthathe. U rişwazire Stefan Löfven’ste dmaslele u cnufyo u huwle şudoyo dgımaydi tedbire casye u mırle; Kımımleno ruğzo mqabıl du cnufyano dıkmisım cala neşe.