İ rişonitho du gabo da Semoloye bu Swed ksaymo qrayto li şultonutho dmawdiyo bu qtolğenso da 1915

İ rişonitho du gabo da Semoloye bu Swed Nuşi Dadgostar bu video dfrısla lu tboco froso, ksaymo qrayto li şultonutho dmanıhto la haye u fusqono du parlamento du Swed dmawdewole bu Sayfo dan 1915.

Dadgostar bu mamlayda kımmo; İ şultonutho d’Turkiya holucdo kımdawmo bu dyoşo da hiyoywotho mşahılfotho, mawxa klozım u Swed dımhalıq dawse u dmawde bu Sayfo, leşan Turkiya’ste dmawdyo u dımhalqo dawsat di demoqratoyutho.

Bu mamleyda i rişonitho kımmo; Şlomo ono ışmi Nuşi Dadgostar i rişonitho du gabo da semoloyo’no. Fayıt zıttır me 100 eşne calu qtolğenzo dsımwo calu camo Othuroyo Suryoyo, Armnoye u Pontusoye mi mamlaxtho Cuthmanoyto. Bhaq du qtolğenzano dan 1915 u parlamento du Swed mawdewole ebe bu snodo da gabe mşahılfe beynothaye u gabeydan da semoloye.

Dadgostar bu mamleyda mırla; U fusqonano, fusqono ulsoyo’we u towo’we u maqbalwo. Elo camhbol mu zabnawo hulucdo i şultonutho manhatla u fusqonano la haye u dmawdco l’Turkiya, di şultonutho Swedoyto gıdmawdyo bu Sayfo. Bu Swed kıtlan mathlo dkomır, u zabno kmanıh kull çurho elo hano latyo şror. U çurho leşan d’noyıh klozamle mawdyonutho u teqbilo, mawxa klozım dmawdena bu Sayfo dan 1915. Kımzahrono i şultonutho dmanıhto u fusqono du parlamento la haye. U mede ulsoyo’yo dıklozım dsaymina leşan dımyaqrina a farsufe dhawın dıbho du Sayfano d’yulfina mu makthabzabno i dawsa qamayto d’Turkiya dımbatlo u tenkiro du Sayfano.

Dagosta kımmo, Ulsoyo’yo lani dhawın dıbhe bu Sayfano u be bzabno leşan i demoqratoyutho wu şuşoto d’Turkiya. Adyawma b’Turkiya kito hiyoywotho sagiyotho u came mşahılfe dıkmidoşi, dlıkqathe dmıjğoli bu leşonathe u dmacişi i marduthathe. Layto mede dkibe madcır u zabno dlowe u qtolğenso aminoyo, elo leşan dmitabde maşıqlo dkibe mawbıl lqudmo, klozım mawdyonutho mani dsımlın u qtolğenzano inaqlayo kiban dımmina yalifina mede mu makthabzabno.

Bu şıkılano u gabo da semoloye du Swed ktolıb mi şultonutho dmanıhto la haye u fusqono di mawdyonutho du parlamento dmıdwole ba 2010 bhaq du Sayfo dsim calu camo Suryoyo Othuroyo dhawi ban 1915 maa abohotho du rejim d’Turkiya du zabnano dıksaymi dyoşo cala hiyoywotho şerşoye du athro xıd a Suryoye.