Bu buyono mşawtıfo dıfris tlib dmıdrış u qonuno hatho du bethdino

U qonuno hatho du bethdino federaloyo du Iraq, kımdawım dmoyıd dukthe bayn da şutose marduthoye, akadimikoye u du huquq du Iraq.

13 tahbaryotho u federasyone mşahılfe du Iraq, bu buyono mşawtıfo dıfrıslın tlıblın dmıdrış u qonunano bırwihutho ma yadıcthone du huquq, u dmişawhır u quwolo acle hula guboye gawonoye dıbqamuthayna.

U qonuno hatho du bethdino federaloyo du Iraq dıkmibacwo dmisamwo acle quwolo, kımdawım d’soyım zmomo bayn da gabe u şutose mdinoye, akadimikoye, marduthoye udu huqoq bu Iraq. Lfuth u şıkıl hatho du qonuno, kmıtlıb dmibayın menyono d’yadıcthone di şarica Maşılmonitho xıd hadome b’gawıd di sictho da dayone du bethdino, awkith dmişahlıf u Iraq m’athro mdinoyo l’athro dıkmimodi a’fusqonayde lfuth i tawditho Maşılmonoyto.

Cali sbuthathe, 13 tahbaryotho u federasyone mşahılfe bu Iraq bu knuşyo dsımlın drışlın i tarmitho du qonuno du bethdino dımqadmo xıd rmoyto lu parlamento d’Boğdod, u frıslın bu huthomo du knuşyano buyono mşawtfo lu tboco froso.

Bu buyonaththe, a’13 tahbaryotho u federasyone mawdaclın du bethdino federaloyo du Iraq cal dkıtyo ulsoyo, klozım u qonunayde laşan dhowe ruşmoyo dmitaqbıl mi sagiyutho da gabe mşahılfe lawğıl du parlamento u larwal, udmimodi a’hzayotho da şutose qonunoye dilonoye, u acmaye ste i tahbartho da sniğre, u federasyon du huquq wa malfone botaysawboye dkıtne yadıcthone bu haqlo du qonuno du nomuso esonoyo. Mawxaste atahbaryotho wa federasyone du Iraq mawdaclın dlıkowe u qonuno du bethdino dmibayın balhude ma gabe folitiqoye du parlamento.

Calathe, u buyono mşawtfo da tahbaryotho uda federasyone tlıble dmişahlıf u mluwo da tlotho du qonuno du bethdino, udhowe bu şıklano “i naqla dhowe xalyutho bu baraj du bethdino, klozım dmibayın dayone hathe bu darbo di mşawronutho bayn da dayone du bethdino federaloyo, u mawtbo celoyo du bethdino wu mawtbo du bethdino du qlimo d’Kurdistan, bnişo dmisım u garanti du dewam di wolitho dkıtle u bethdino federaloyo”.

Bebzabno, a’13 tahbaryotho u federasyone du Iraq tlıblın dmişawhır u quwolo calu qonuno hatho du bethdino du Iraq hula guboye gawonoye du parlamento dıbqamuthayna, cal da şartat dkito adyawma lıkşowın dmibayın u qonunano.