18/03/2021

U Bethdino d’Den Haag maqbele i dacwa dımqadmo mqabıl d’Erdoğan u d’Alsarraj

U bethdino Emwothoyo da hawbe d’Den Haag, maqbele i dacwa dımqadmo mqabıl du rişqutno d’Turkiya Receb Tayip Erdoğan u du rişono di şultonutho d’Alwifaq d’Libya Fayez Alsarraj.

Bi dacwa dımqadmo lu bethdino d’Den Haag, Erdoğan u Alsarraj kmıthomi dsımlın 20 gunhe du qrobo b’Libya.Athmıl maslım lu bethdino Emwothoyo d’Den Haag, dacwa mqabıl d’Erdoğan u Alsarraj, dıkmıthomi dsımlın 2 gunhe du qrobo b’Libya ubu dyoşo d’33 qonune Emwothoye. Ajans da tebe d’İtalya mawdacle du makıthbo du mqimdino gawonoyo d’Den Haag, maqbele i şkuwe dımqadmo mqabıl d’Erdoğan u Alsarraj mu Tuksoo da debhe di marhıbonutho udi tuhmonoyutho d’Libya bi methcadronutho du qentrun da buhone d’Afriqya ud’Asya.

İ şkuwathe dımqadmo bu ışmo; i bceldboboyutho Turkoyto cal Libya, ktuhmo baroyo Erdoğan xıd farsufe u menyono ma rişone folhoye du gayso Turkoyo, u bebzabno ktuhmo’ste Alsarraj dkıtwe meqım u rişono du mawtbo di rişonutho d’Libya u menyono ma mşale di şultonutho d’Alwifaq dtayimo i wolithayda cam menyono hreno d’rişone da grube mzayne d’Libya.

Bi dacwa dımqadmo lu bethdino d’Den Haag kmitawmır; Erdoğan u Alsarraj wa farsufe hrene dmathkır ışmonaye, hawın mcadrone bu tuyobo d’20 gunhe du qrobo b’Libya. Cala gunhani kmimıd hşowo lfuth u qonuno Emwothoyo, u kmıhşowi gunhe mqabıl di noşutho. A farsufani dışlın’ste u fusqono du Mawtbo di Mşaynutho d’Emwotho Mhaydotho dan 1970 dıkmonıc u zebono yaste u şedoro du zayno l’Libya wa fusqone dmidi bıthır u dmati u menyonathe l’33 gunhe. Bebzabno, a farsufani dışlın a qyome Emwothoye dıkmahırmi u snodo da marhıbone yaste dmitahwelın droşe u dmitıstacımli ba qrobe.

Me gabo hreno, u Tukoso Emwothoyo du Sutoro da Mşihoye-İDC, u Komisyon Athronoyo dan Armınoye b’Amerika wu Mawtbo da Hellen b’Amerika, ramhıl bi şoctho di hdo d’falge d’yawmo, gıdmtaybi knuşyo lu tboco froso ulu ray gawonoyo dbritho ubu knuşyano gıdmisım qroyto l’Waşington dmaydo tedbire leşan dmitaqwiyo i mşaynutho athronoyto wi aykanoyutho da zedqe noşoye b’Turkiya.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…