Bu yawmo şatonoyo di Sohdutho du Sohdo du MUB-Matay Rabo İskander Alptekin, a noqufe d’MUB wu ahıl du Sohdo mathkarlın a 15 eşne di Sohduthayde

WIESBADEN / KAFRO – U duxrono du Sohdo Skandar Alptekin-Matay Rabo kull şato kmisım u kmıfrıs maqırhonwotho cali sohdutheyde. Adşato’ste a şutose d’MUB dkıtne b’Turkiya sımlın duxronayde calu qawreyde dkıtyo bi qritho d’Kafro i tahtayto b’Turabdin. Bıthır mi slutho dsimo bi cito, mqadım’ste fako d’ramhe cali ruhayde.

Bi cito d’Mor Eşacyo dkıtyo bi mdito d’Wiesbaden d’Almanya maqım teşmışto mu kohno di cito Abuna Xuroyo Sabri Şahin u hiw furşono da canide cali ruho du Sohdo Matay. İ teşmıştathe maqimo calu talab dhawile u ahıl wa noqufe d’MUB b’Wiesbaden mi cito d’Mor Eşacyo, bi cohnutho du duxrono şatonoyo da 15 eşne di Sohdutho d’Matay Rabo.

Bıthır mi teşmışto u kohno sımle mamle dımqalasle i hdodyutho du cameydan wu nfoqo du moro dla sohdayde. U Huyodo Suroyo d’Urifi bu buyono dfrıswole 18 bu yarhano cali Sohdutho d’Matay Rabo, mqalaswole i şaxsiye wi ruho makıxto wa klayotho dkıtwole, hawiwo remzo da fulhone du Mawtbo Umthoyo d’Bethnahrin.

ESU mırwole’ste; A rişoneydan-a Sohde dhulın a hayathe dıbho li hirutho du cameydan’ne. Mawxa inaqla dmaydina a Sohde mşale lruheyna inaqa’yo kiban dobina funoyo la hçome dkowın aclayna u kiban dmihaydina hedor i Sohdutho.