Çelik grışle u zuhoro cala hjome dkowın cala Mşihoye du athro

U qoyumo du cameydan bu parlemento d’Turkiya Tuma Celik bi maqırhonutho dhule lu tboco froso grışle u zuhoro cala mamle tuhmonoye u di bcelıdbobutho dıkmisomi me mşale u kmıfrosi bu tboco froso.

 Amamlanine dkowın celtho lu qatlo da mşihoye, u dıgcubri da mşihoye dsaymi a slawothathe tahte di noturutho da haylawotho di mşaynutho.

 U qoyumo bi maqırhonutheyde komır bi şabtho d’şaficina hawi hjome cala bethqbure da barmothoye mşihoye b’Trabzaon b’Ankara, bı tarbzon mawqıd u slibo dkıtwe calu waro u bu zabno du cufoyo mazcıq Alahu akbar, u b’Ankara ste hawi hjome cal 20 qawre da mşihoye.

Bzabne frişe kowe hjome cala dukotho u botay slawotho da mşihoye b’dukotho frişe b’Turkiya, b’haq da hjomani hul adyoma lawi buhone u buqore xdu mede dıklozım. Wa hayobe kulnaqa marfın u hathe hawyo xıd siyase man mıd soyım mqabıl da mşihoye lıkmıhkım. Çelik komır bıthır ma hjome haroye i şıltonutho mahıtla haylawotho di mşaynutho quma citawotho, u bu şıkılano a slawotho kmisomi tahtıd duyoqo da haylawotho di mşaynutho.

Me gabo hreno a mamle wa kthawyotho dkıtne tuhmonoye dkibın bcelıdbobutho mqabıl di mşihoyutho kfıthi darbo la hjome dkowın, lfuth u waqıf d’Hrant Dink bi şato d’şafician ba 8 yarhe qamoye sıttır me 2 alfo mamle u kthawyotho di bcelıdbobutho frisi, en i şıltonutho lı kobo ağuno mqabıl da mamlani kfıtho darbo quma hjome dkowın. Mawxa u qoyumo Tuma Çelik bi maqırhonutheyde komır klozım bzabno karyo mitahwe ağuno mqabıl da hjome u da mamle dkowın, wa bethdineste dmahwın i şarirutho da qonune u dmaydi a sıbwothani li ido.

Me gabo a mşale da jamacat ste klosım howın a mcaqbone da sıbwothani, a hjome dkowın cala bethqbure lıklozım mıhze bınne bnacimutho, wa mşale d’Ankara u dı Trabzon klozım saymi buqore rwihe, wa hayobe dmıhkomi.