Athmıl’ste maqım teşmışyotho ma kohne da citothaydan dkıtne b’mdinotho d’athrawotho frişe d’Urifi, leşan i Sohıdto d’MUB İzla Özgun

ALMANYA/AUSTORIA – Athmıl dsımwo u caza haroyo di Sohıdto d’MUB İzla Neriman Özgun Rucyo bi mdito d’Mıdyad, maqım’ste ba citothaydan b’Urifi teşmışyotho cali ruhayda. Me 6 bu yarhano d’Odor-dkıtwe u yawmo dmıdla duktha beyn da Sohde du ağono umthoyo, kımdawmi a hadome u noqfe d’MUB’ste dnufqi moro li Sohıdtathe b’mdinotho d’athrawotho frişe d’Urifi. 

Bi cito d’Mor Eliyo u Mor Had Bşabo bi mdito d’Vesteros du Swed, maqım adyawma teşmışto cali ruho di Sohıdto İzla u Abuna Xuroyo , mahkele cali mıcne di Sohdutho mınyo. Bu madhıbho’ste, sımle u hadomo d’MUB Jacob Mirza mamlo u mahkele cala haye di Sohıdto ucala fulhone dsımla bıgawe du ağono umthoyo. Bıthır bu salon di cito’ste, sımla Mirza mamlo cala şuşote haroye dkowın b’Suriya.

Bi cito d’Mor Aho bi mdito d’Örebro du Swed’ste, Abuna qaşişo Melek Ulger huwle fuşoqo cali mıcne di Sohdutho u mahkele cala hayYahkub Tahhane ucali fedakariye dhuwla di Sohıdto İzla. Bebzabno athmıl Abun Xuroyo Sabri Şahin-u kohno di cito d’Mor Eşacyo bi mdito d’Wiesbaden maqımle teşmışto u hiw furşono ma noqufe d’MUB cali ruho di Sohıdto Izla Neriman.  

 U Qurobo Alohoyo mrayşın mu metrofolito Mor Theofilos dr.Quryaqus dkıtyo mu Hınd ubu cudrono d’Abun Xuroyo Sabri Şahin, u qaşişo Abrohom Kurian uda şamoş u şamışyotho di cito d’Mor Eşacyo. Lu duxronano di teşmışto, hadır mşale me gabe u şutose du camaydan di mdito-Issa Mascud u Sabri Alkan mi Mtakasto Othurayto Demoqratoyto, umu Mawtbo cito d‘Mor Eşacyo-Abrohom Ocak u mathlone mi Sictho du Hudro Othuroyo d’Bethnahrin d‘Wiesbaden u cama mathlonyotho di Şictho da neşe du hudro.

Cal ışme da hadome d’MUB b’Wiesbaden, mqadım tahınyotho li mcalyutho du hasyo uda kohne u mşale da şutose du camaydan dhadiri acmaye bu yawmano. Me gabo hreno a citotho bi mdito d’Viyana d’Austoria-d’Mor Afrem camu kohnayda Afram Gawriye, d’Yuldath Aloho camu kohnayda Toma Qas İbrahim, maqımme athmıl 16 bu yarhano, teşmışyotho cali ruho di Sohıdto İzla u huwlın mawdconutho acla ucala fulhonayda.

U kohno Josef Halabi di cito d’Mor Yahkub da Sruğ Kubrun bi mdito d’Paris maqımle teşmışto wa hadome d’MUB mqadame fako d’rahme cali ruhayda.