CIRAQ: a madraşyotho Suryoye di mditho d’Kerxıslox mcayadlın i rişıdşato umthoyto d’Akitu

Bu siqumo d’3 u 4 bu yarhano d’Nison, a’madraşyotho Suryoye di hiğmonutho d’Kerxıslox du garbiyo du Ciraq, mtayablın hfitwotho mşahılfe bi cohnutho di rişıdşato Suryoyto Bıbloyto Othuroyto d’Akitu da n’6772.

Baynothaye i madraşto Suryoyto şarwoyto d’Bahra, bi hfitutho dımtaybola yawme d’Huşabo dşaficina, sım mamle calu sukolo d’Akitu ucala remze dkıtle, u mqadımste raqde u zmirotho ma yolufe. Li hfituthathe mıştawtafla i mşalonitho di dayira di tarbitho d’Kerxıslox Sawsan Jadduc, menyono ma mşale di tarbitho u nahire di hiğmonutho d’Kerxıslox cami mdabronitho di madraşto d’Bahra wa malfone u malfınyotho u yolufe di madraşto.

Yawme dı Tre dşaficina ste, i madraşto d’İştar da bnotho du jumnasyet wi madraşto şarwoyto d’Anastas Alkarmali, mtayablın hfitutho mşawtafto bu cedo umthoyo d’Ha Nison. Li hfituthathe mıştawtafle u rişono di marcitho Kaldoyto d’Kerxıslox hasyo Mor Yusıf Tuma, u mcadrono du mdabrono gawonoyo di tarbitho d’Kerxıslox Cumer Qader, u mdabrono du yulfono Suryoyo u ferco d’Kerxıslox Munir Jalal, a’mdabrone da tarte madraşyotho d’İştar ud’Anastas Alkarmali u menyono celoyo mu camaydan u Kaldoyo Suryoyo Othruoyo.

Bi hfituthathe, u hasyo Mor Yusıf Tuma bu mamlo dsımle mhanele u camaydan du Ciraq bi rişıdşato umthoyto hathto d’Akitu, u mawdacle ste du cedano hiyoyutho makthabzabnoyto u mdinwoyto du camaydan d’Bethnahrin yo.

Bi hfituthathe mqadım ste masrahto ma yolufe da madraşyotho cam zmoro u raqdo, u mimre bu leşono Suryoyo.