DAŞTO d’NINWE: Ftih ganathşabre u qentrun hatho di hasyutho di cito Suryoyto Qatholiqoyto b’Bağdede

U fatıryarxo di cito Suryoyto Qatholiqoyto Mor İğnatiyos Yawsef Tlithoyo Yunan bi socurutho dsımle yawme d’Cruto dşaficina li mditho Suryoyto d’Bağdede di daşto d’Ninwe, mıstaqbıl ma hsayo u kohne di marcitho umu qaymaqam Suryoyo Cisam Bahnam Matti umu menyono celoyo mu camaydan d’Bağdede.

Baroyo bıthır mu qubolo ruşmoyo u camonoyo dsim li qadişuthayde ucama qole da hılhole da neşe, fatıryarxo Yunan qısle u şorito du futoho di hasyutho hatho d’Bağdede, ubıthır mathe mşare bu zawho da qole du tekso citonoyo dilonoyo du futoho di hasyutho hathto.

Fatıryarxo Yunan bu mamlo dsımle la hadire mırle “bkul feshutho ksamno socurutho li mditho d’Bağdede. İ mdithathe dkıtyo cazizto cal lebi, udkıtyo şubhoro di citaydan i Suryoyto Qatholiqoyto. Kul noşo kodıc mın hawi li hasyuthaydan d’Mawsal, mawxa athino laşan dımbaraxno u d’samno u futoho du qentrun hatho di hasyutho”.

Bıthır mıdkamıl u zawho du futho, fatıryarxo Yunan sımle socurutho li dayro di iqartho mqadaşto di knuşto da dayroyotho Afremoye d’Bağdede, u mıstaqbıl ma nacime da ganathşabre di iqartho mqadaşto dıtcınlın a’tarfe da zaytune ud’mırlın qole da Oşacne li qadişuthayde.

Bıthır mathe, fatıryarxo Yunan sımle u futoho da ganathşabre u bızle acla maye mqadşe, u mbaraxle an’ahwotho dayroyotho Afremoye dhawilın tacbo rabo bi şetoso da ganathşabre di iqartho mqadaşto.