12/04/2021

David Lega kmawdıc dıklozım u Huyodo d’Urifi dmakle a duroşe di hadomutho d’Turkiya

U hadomo Swedoyo du parlamento d’Urifi mu gabo da Mşihoye Demoqratoye David Lega, frısle mimartho cali celtho dıklozım u Huyudo d’Urifi dmakle a droşe di hadomutho d’Turkiya bu Huyodo.

Bi mimarthathe d’Lega, camgabe dıkmawdıc d’Turkiya kımdawmo d’ruhqo mu Huyodo d’Urifi, grışle’ste u zuhoro calu fusqono dmıdle u bethdino d’Turkiya mqabıl du dayroyo Suryoyo Aho Sefer Bilecen.

Bi mimartho yarıxto dfrısle u hadomo Swedoyo bu parlamento d’Urifi mu gabo da Mşihoye Demoqratoye David Lega mawdacle, d’Turkiya lıkmtabqo a şartat dımahti quma leşan dhuwyo hadımto bu Huyodo d’Urifi. Bıgawe d’Turkiya, kmifaşıl u sistem di dawle wu kmidoşi bşıkıl sistematik a zedqe noşoye. Larwal d’Turkiya-xıd maltho lan athrawotho hadome du Huyodo’ste, kıtle u rişqutno Erdoğan qedomo qaşyo.

Bi mimarthathe Lega kımdawım; Meqım kmo şabe’ste grışle Erdoğan u athro mu lumodo d’Stanbul-dkıtyo mqabıl du cnufyo dıkmisım cala neşe wa hayle mnatrone d’Turkiya kımdacın, du qyomano kımşakıl qento li iqartho. Elo u cnufyo qaşyo dıkmisım cala neşe b’Turkiya-sbutho idicto’yo.

Lega bıthır grışle u zuhoro calu fusqono dmıdle u bethdino mqabıl du dayroyo di cito Suryoyto Orthodoksoyto Aho Bilecen u dhkim l’2 eşne u yarho hbuşyo, cal dhuwle maye u muklo l’2 Kurdoye dkıtwın kafine. U dayroyo m’akadleste, d’wolitho tawdithoyto’yo dmitahwe muklo lkull farsufo dıkmohe bu tarco di dayrayde. Lega komır; Elo camhbol, u fusqonano du bethdino Turkoyo, ha mi şişaltho da rdufye qaşye dıkmisım cala Mşihoye b’Turkiya’yo.

Bi mimarthathe’ste Lega grışle u zuhoro calu qedomo dhawila Turkiya li rişonitho du Komisyon d’Urifi Ursula von der Leyen bu zabno di socurutho dsimowa l’Ankara u dlo hiw duktho du yitowo ela. Calathe Lega komır; Ono qanico’no, u Huyodo d’Urifi laybe dımdawım dımqadım b’basimutho l’Turkiya. Lıklozım dmitahwela duktho bu Huyodo u loste dmisım ğer qyome acma. Lega komır; Urifi belhude kull naqla kobo u kobo, u Turkiya belhude kıtulbo heş u kımqadmo b’qaşyutho l’Urifi-kımmina basyo, klozım harke dmitahto i nuqto harayto qum Turkiya.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…