Donald Trump kobıc dmahıt gumruk b’timo d’50 ba mo, calu mal dıkcobır lu athro mu Huyodo d’Urifi

WASHINGTON – Mu zabno d’dacır Donald Trump li rişonutho d’Amerika, xlıqle hfuxye mşahlıfe ubi haraytathe’ste, fsıqwole dmacle u timo du gumruk du mal dıkcobır l’Amerika me athrawotho frişe dbritho-dilonoyith mu Sin. İ paketathe du gumruk d’Trump, mfaşqo i qşitho dkulle bu zabno modern dıkcayşina. 

Ucdo’ste gzımle Trump dkobıc dmacle u gumruk du mal dıkcobır l’Amerika mu Huyodo d’Urifi l’50 ba mo. U rişono Amerikoyo sımle sturyo u Huyodo d’Urifi u kımdace, du huyodo mşatıs belhude leşan dmıstafıd mi tagorutho d’Amerika. Bebzabno Trump mawdacle’ste dlatyo thnihoyo mu şıkıl da esore dkito beynothaye.

Bi dafayde’ste Trump komır; A droşaydan acmaye, lıkmotın l’duktho u calathe tlıbli, dmitacle u gumruk du Huyodo d’Urifi l’50 ba mo wu şuhlofano’ste dımşare me 1 bu yarho d’Hziron. Bebzabno Trump sımle i şırke d’Apple wu morayda Tim Cook’ste sturyo u kımawdıc, du snoco da telefone di ido-u iPhone d’Apple, kibe dmisım b’Amerika ulo bğer athrawotho.

Trump komır; U iPhone-lo bu Hınd u loste bğer dukotho-u snocayde klozım dmisım b’Amerika. Dloste, gıdmıçboro i şırke d’Apple dobo gumruk d’25 ba mo l’Amerika. A rişone du Huyodo d’Urifi grışlın u zuhoro d’Woşington u mawdaclın, du şuhlofano du gumruk gıdm’athır cala 2 gabe ulo belhude cala Urifoye.

Xıd funoyo lu gzomano d’Trump, u Huyodo d’Urifi’ste mahwele hfuxyo u mawdacle, dkıtyo hadiro dımdafıc ruhe wa yuthronayde u dımqadım bcayni şıkıl l’Amerika. Bu şuroyo du yarho d’Nison mawdacwole Trump dgımahıt gumruk d’20 ba mo calu Huyodo d’Urifi elo bıthır manhatwole l’10 ba mo, hol 8 bu yarho d’Tamuz bnişo dobe mkono la Urifoye dımqadmi li tablitho da bazare.