Drişi a şuşote haroye di hedriye da guboye gawonoye du athro du Iraq

İ rişonitho du tukoso d’Emwotho Mhaydotho bu Iraq, hawila ytawto camu rişono du Komisyon celoyo da guboye du Iraq leşan dmıdroşi a şuşote haroye di hedriye da guboye gawonoye du athro.

Bebzabno i şultonutho d’Boğdod mıdla fusqono, dmısxori bu zabno da guboyani a thume di naşfe udi hawa u dmitakle u mazlo u mathyo beyn da qlime du athro.

İ rişonitho d’UNAMİ Jeanine Hennis-Plasschaert hawila adyawma ytawto camu camu rişono du Komisyon celoyo da guboye du Iraq-Jalil Adnan, leşan dmaydo mawdconutho cali aykanoyutho harayto di hedriye da guboye gawonoye dgımisomi 10 bu yarho dıbqamuthayna. Bu mamlayde Adnan, mahkele calu duyoqo di mşaynutho da nuqazyotho da guboye wi hedriye dsimo bu yarhano kule.

Plasschaert’ste m’akadla cali ulsoyutho dmidawmi a fulhonani bnişo dmisım guboye qawye dkibın dqumri u tuxlono du camo kule. Bi sbutho da guboyani’ste, u rişono ruhonoyo da Şica Ayatollah Ali al Sistani huwle athmıl maqırhonutho u mşaçacle a Iraqoye kulle, dmıştawtıfi ba qolathe la guboyani. Sistani mırle; A guboyani, u darbo mşayno dkulle’ne leşan u dactith towo du athraydan u dnofıq mu kriz folitiqoyo u momunoyo dkıtyo ebe.

Bebzabno u Komisyon celoyo di mşaynutho da guboye du Iraq frısla egartho u m’akadla, du Iraq sxırle a thume oyaroye, a thume dcaman athrawotho şbobe u mhadadle u mazlo u mathyo da comure, bnişo dqodır dsoyım u duyoqo di mşaynutho da guboyani. Yawmo meqım ma guboye, gıdmısxori a thume oyaroye u gıdmıftohi naqla hreto bıthır yawmo.

La guboyani kito 3.249 folitiqore mraşhe; beynothaye 951 neşe dgımçahdi la 329 kursiye dkito bu parlamento du Iraq. 9 ma kursiyayni’ste mbayni la qalilotho dkıtte 67 mraşhe; beynothaye u mraşho du camaydan Jozef Sliwa dkıtyo mi lohitho du gabo du Huyodo d’Bethnarhin Athroyo da 141. İ tahrazto d’Sliwa kmişaklo me 3 haqle-athronoyo, noşoyo u umthoyo. Bu haqlo umthoyo, kımtalıb Sliwa ba zedqe du camaydan udqodır huwe dımdabır u dactith d’ruhe.