17/01/2021

I cito Suryoyto Orthodoksoyto bi marcitho d’Rheinland-Pfalz d’Almanya hawyo ruşmoyto

I cito Suryoyto Orthodoksoyto bi marcitho d’Rheinland-Pfalz d’Almanya hawyo, u guşmo trayono ruşmoyo b’Almanya.

 Bi harayto di şato dşafıcina i şultonutho d’Hessen m’akadwola, di cito Suryoyto maqıblo xıd şutoso ruşmoyo bi marcitho d’Nordrhein-Westfalen.

İ cito Suryoyto Orthodoksoyto d’Anioxiya b’Almanya, matila tebo hreno mafsıhono-hanaqla mi şultonutho di marcitho d’Rheinland-Pfalz. Bu tebano mawdıc, di cito Suryoyto d’Warburg qayıthla u zedqo dhuwyo şutoso ruşmoyo bi marcithathe. Bıthır mıd i şultonutho di marcitho d’Nordrhein-Westfalen dmaqbela i ruşmoyutho di cito, ucdo’ste i şultonutho di marcitho d’Rheinland-Pfalz mıdla cayni fusqono makthabzabnoyo

İ şultonutho d’Rheinland-Pfalz mşadarla egartho li hasyutho dkıtyo b’Warburg u m’akadla dkıtyo ucdo i cito ruşmoyto bi marcithathe.U hasyo di marcitho Mor Filiksinos Mattias Nayis, wu rişono du Mawtbo celoyo, Davut Aslan, mawdace i fsihuthathe calu fusqonano ubı şme di marcitho kula mqadamlın a tahınyothathe li şultonutho uli rişathwazire di marcitho d‘Rheinland-Pfalz, Marie-Luise Anna Dreyer.

Bi maqırhonutho du fusqonano’ste griş u zuhoro cali cito Suryoyto Orthodoksoyto, dkıtyo hdo ma citotho catiqotho b’britho udu şerşayda kothe me Turkiya, Suriya, Cıraq, İran u Lebnon udu camo Suryoyo kmıjğıl u leşono d’Yeşuc Mşiho.Bebzabno mawdıc, di cito qamayto b’Almanya mşatsowa ban 1971 b´Augsburg u kıtwola 56 çamacat b’Urifi.

İ dayro d’Warburg dkıtwa meqım da Domenikan, mido ban 1996 mi cito Suryoyto u markıw u bethmqomo di hasyutho 18 İyor dan 1997 bi cito d’Mor Yahqub da Sruğ b’Warburg. Adyawma i cito Suryoyto Orthodoksoyto kıtla 60 citotho u hedor 100.000 hadome. Ma 2012 u hasyo di marcithathe’ste Mor Filiksinos Mattias Nayis yo.

Check Also

USAİD kımdawım d’sonıd u maşıqlo du bnoyo u du hethotho di daşto d’Ninwe

U tukoso Amerikoyo du quyomo Emwothoyo-USAİD, kımdawım d’sonıd u maşıqlo du bnoyo u du het…