Emwotho Mhaydotho mahwele ilo thınihuthayde mqabıl da hjome d’Turkiya calu Iraq

U Mawtbo di Mşaynutho d’Emwotho Mhaydotho, mahwele ilo thınihuthayde cala hjome folhoye dıksaymi a hayle Turkoye calu garbiyo du Iraq, u sımle qroyto lu Iraq u l’Turkiya, dşorın a qetrathe bı darbone folitiqoye.

 Me gabo hreno, i wazirutho di baroyutho du Iraq mawdacla da darbone kulle ftihene qum du Iraq, leşan dobe funoyo la dyoşe dıkmisomi me Turkiya cali morutho du athrathe.

U rişono du Mawtbo di Mşaynutho d’Emwotho Mhaydotho Christoph Heusgen bi maqırhonutho dhule lu tbocofroso, mawdacle du tukoso Emwothoyo latyo thnihoyo cala hjome folhoye dıksaymo Turkiya calu garbiyo du Iraq, u mathkarle dlayto ulo mawdconutho dıkmahwiyo du Iraq tlıble dmisım knuşyo dilonoyo leşan Turkiya dsaymo a cuqobani ban arcothayde.

Heusgen dımakadle dıklozım Turkiya wu Iraq dşorın a qetrathe b’şıkıl folitiqoyo, mırle; Bi sbutho du Iraq u Turkiya latwo ulo naqla talab dhuyo i sbuthathe bıgawe di tahrazto da fulhone d’Emwotho Mhaydotho. U kmıtyaqano du qetro dkito beynothaye, klozım bu darbo folitiqoyo dhowe u şroyayde ulo bu darbo folhoyo.

Me gabo hreno, u malolo di wazirutho di baroyutho du Iraq Ahmad Alsahhaf, bi maqırhonutho dhule mırle; A fulhone dıkmisomi me ha gabo, lıkmaqwın i mşaynutho u lıkloqın b’fulhone hrene mşawtıfe mqabıl di marıhbonutho. Mawxa a darbone kulle ftihene bı qamuthe du Iraq, leşan dobe funoyo la cuqobe folhoye d’Turkiya dıkdayşi i morutho athronoyto du Iraq.

Alsahhaf mathkarle du Iraq mşarele bı buyono dıkrıhle ebe ahjome Turkoye calu garbiyo du Iraq, ubıthır maslamle egartho du protesto la 2 rişizgade d’Turkiya udu İran, uba melani mdawamle; Lkımaydina a dawsatani, u kiban dnuqlina i sbutho lu Huyodo Caraboyo uli Mtakasto di methcadronutho Maşılmonitho, u kibeste bi harayto dkulle dımqadmina şkuwe l’Emwotho Mhaydotho ulu Mawtbo di Mşaynutho d’Emwotho Mhaydotho.