Emwotho Mhaydotho tlıbla mcadronutho msarhabto la galwoye d’Suriya

Emwotho Mhaydotho tlıbla mcadronutho msarhabto, l’3 milyone galwoye dkıtne bu garbyo d’Suriya.

Mawdıc dhol ha ma 3 sahme da galwoyani, latte duktho du fyoşo , u lbuşe şahine u ğer sniqwotho ulsoye dıkluzmi bu zabnano du sathwo qaşyo dkito b’İdlıb u b’Holob.

U mcadrono du rişono du Tukoso Emwothoyo di mcadronutho noşoyto Rameş Rajasingam huwle athmıl maqırhonutho bu Mawtbo di Mşaynutho d’Emwotho Mhaydotho cali aykanoyutho da galwoye dkıtne bu garbyo d’Suriya dilonoyith da galwoye d’İdlıb u d’Holob.

U mşalo Emwothoyo mawdacle, da tukose noşoye d’Emwotho Mhaydotho kıtte sniqutho l’mcadronutho msarhabto leşan 3 milyone galwoye d’Suriya. Bıthır ma mattre dnahiti bu garbyo du athro, hariwi a xaymotho ba maşıryotho da galwoye.

A galwoyani’ste kıtte sniqutho lduktho du fyoşo, lbuşe şahine, battaniyat, mazot uğer sniqwotho dıkluzmi bu zabnano du sathwo. Bi şato haraytathe hol 9.3 milyone dıbnaynoşo b’Suriya hawilın bsirutho da muklone wu mınyonanoste kımdawım dcole. Wu ban 6 yarhe haroyaniste zayıd u mınyono da tloye l’4.6 milyone dkıtne kafine u sniqoye l’mcadronutho.

Bu qrobano dkımdawım b’Suriya, madcıf u sistem du hulmono wu virus di Corona, huwle husrono lu hulmono du camo u lu momuno du athro. Emwotho Mhaydotho mqadamla mcadronutho u muklone l’1.600 dukotho dkibın camo faqiro elo kull dkothe, kızoyıd u mınyono da bnaynoşo dkıtte sniqutho lımcadronutho noşoyto.

Mcal fothe du qrobano d’Suriya, kito adyawma hol 500 alfo bnaynoşo galwoye bıgawe du athro u 5.6 milyone mgalwelın lğer athrawotho şbobe. U krizano d’Suriya, kmifaşıq u kriz noşoyo dhawi hol ucdo bı britho mu zabno du qrobo da II dı britho.