Erdoğan laşan dmarkıx imwatyutho camu Huyodo d’Urifi mşarele ba esore cama mşale

Bıthır mıd u Huyodo d’Urifi fsıqwole meqım şabtho dımhaydır mınyono d’tedbire mbayne cal farsufe Turkoye, hawile athmıl u rişqutno Turkoyo mamlo camu rişono du Mawtbo d’Urifi Charles Michel.

 Bu mamlo dsımle Recep Tayip Erdoğan mawdacle, d’Turkiya kubco dbınyo u dactithayda camu Huyodo d’Urifi u dkıtle sabro d’Turkiya u du Huyodo dnufqi mi huktho bışto.

Yawme d’Cruto dı şafıcina, layimiwo a rişone dan athrawotho hadome du Huyodo d’Urifi lı knuşyo, leşan durşi iklaytathe bi sbutho da zawce u da camle provokativ dıkmaşyo ba thume du yamo d’Qufrus u du Yawnan bu madınho du yamo Mescoyo. Bi netije, bu knuşyano mtewo lawyutho du Huyodo d’Urifi dımhaydır mınyono d’tedbire mhadıde cal farsufe Turkoye dıkmaşın fulhone leşan u tewfiqo d’ğaz u nafto mu madınho du yawmo Mescoyo.

Elo u Huyodo mşawharwole bıthır a droşe lu yarho d’Odor dıbqamuthayna en gıdmitahıt tedbire casye. Cali dawsathe dımhalaqle u Huyodo d’Urifi, abıc u rişqutno Turkoyo Recep Tayip Erdoğan dımbasım a esore u dmarkıx i mwatyutho dhawyo camu Huyodo d’Urifi u hawile athmıl mamlo camu rişono du Mawtbo d’Urifi Charles Michel.

Lfuth Erdoğan, Turkiya kubco dbınyo u dactithayda camu Huyodo d’Urifi. Erdoğan mawdacle d’Ankara wu Huyodo klozım dnufqi ma esore lo towe du bromo u ftolo dcal hıdode u tlıble me Michel, dımhalqi dawsat zıttır mcadle u mawthrone laf Turkiya. Kul dawse msimonitho ba esore beyn Turkiya u Huyodo, kawtho du gado u du şuşotoyo.

Bebzabno Erdoğan mdacele dkıtne hadire dmabdın droşe camu Yawnan u cala idicat dıkmqadmi bi sbutho da thume du yamo, u thımle i şultonutho d’Athena, dıkmahzımo ma droşe u calathe klozım dmisım lumodo calu madınho du yamo Mescoyo. U Huyodo d’Urifi dıksonıd a 2 athrawotho hadomayde, tlıbwole ğalabe naqlat me Turkiya dımsafe u şwolano bu darbo du dialog elo Ankara tuhmowa u Huyodo, dıkmqadım li sbuthathe belhude mıha gabo awkith ksonıd u Yawnan u Qufrus.