Erdoğan sımle naqqahreto isbutho di cito d’Ayasofya teştıcınyo di siyaseyde

I cito rabtho u yaqırto d’Aya Sofya dkıtyo b’Stanbul d’Turkiya, naqla hreto midola i şultonutho d’Erdoğan la teştıcınye di siyasayda.

 Lfuth a maqırhonwotho haroye komır; İ citathe kiba dmıftoho li slutho da Maşılmone dhuwyo masığdo li tayutho.

i cito d’Ayasofya dkıtyo b’Stambıl sxirowa li slutho bi şato da 1931 u bıthır bi şato da 1934 bu fusqono dmıdwo mi şıltonutho du zabnawo simowa duktho di mıthawyonutho maktabzabnoyto, u bu şıkılano ftiho me hatho la socure. Mu zabnawo hul ucdo hawxa kımdawmo.

Elo zabnoyo zagiyotho a gabe dı Turkiya simolın malzame di siyase lruhaye.  Ucdoste Erdoğan ba maqırhonwotho dsımle bu zabno haroyo komır, kiba mıftoho li slutho di maşılmonutho u misomo masığdo. Erdoğan latyo inaqa qameyto dıksoyım a maqırhonwothani mqabıl di cito d’Ayasofya, mawxa bıthır mu mamlo dsımwole bi şato da 2016 u hudro  da waqfat da citotho u di teşmeşto du mahduro ftıhwole bethdino dmibatıl u fusqono dmıdwo bi şato da 1934 dıfsıqwole di cito dı huyo bethcatiqutho Muza.

Bıthır ma mqırhonwotho d’Erdoğan u bethdino mıscoyo d’Turkiya mawdacle dımbayanle yawmo du fusqono dkıtyo 2 bu yarho d’Tammız di şatathe. Bi şato da 2005 naqqa hreto u hudrano ftıhwole bethdino bıhaq di sbuthathe elo lı maqbalwo.

Lfuth a yaducthone Erdoğan laşan mşahlıf u yawmoyo du athro u dilonoyith dıkmitawmır du gabo d’AKP knuqsi a qoleyde mabdele u droşano di cito d’Ayasofya. Bhaq da maqırhonwothani a rişone du athro du Yawnan mahwelın i lo thnihuthathe u krıhlın u qedomo da maqırhonwotho harufe dıksoyım Erdoğan bu zabno haroyano.