ESU bu buyono dıfrısle mathkarle a sohde d’Simele

Me gabo hreno, u Huyodo Suroyo d’Urifi-ESU, frısle buyono bi cohnutho du duxrono şatonoyo du qtolcamo d’Simele.

 Bi rişitho du buyonano ESU dıkmşare ba mele; kımathkrina a Sohde du qtolcamo d’Simele, bşıkıl rwiho kmitahke aydarbo u rejim du rişono catiqo du Iraq Saddam Hussein mıdle nişo u camaydan d’Simele u hedora.

U Huyodo Suroyo d’Urifi-ESU, mathkare a Sohde du qtolcamo d’Simele, bu buyono difrısle lu camaydan ulu ray gawonoyo dibritho. ESU mırle; kımathkırina i ruho da Sohde du qtolcamo d’Simele dsımwo calu camaydan u Kaldoyo-Suryoyo-Othuroyo 7 bu yarho d’Ob di şato dan 1933 bu zabno dımşatso i şultonutho hathto du Iraq. Bu qtolcamano, midiwo a neşe wa tloye dlatwolın hawbo nişo lu qatlo dhol 5 alfo bnaynoşo u hol 60 qıryawothoste mahrıwiwo.

ESU dmahkele calu terkiwo di siyase di şultonutho hathto du Iraq u mıdwo u camaydan nişo li barbroyutho dsimowa. U qtolcamano sımwo calu camaydan dşafıcwo mu Sayfo dan 1915 uba qatle d’Hakkari ban 1924. A qatle, a qtolcame wa qtolğense sistematik dsimi calu camaydan, trelın husrono rabo acle bu haqlo di mardutho, du momuno, du kenşo u bı haqle hrene u trelın ithutho du camaydan dnuqso ba dukothayde a şerşoye.

Camgabe du qtolcamo d’Simele, ESU grışleste u zuhoro calu husrono dıhzele u camaydan mi şato da 2003 ma hjome, ma htofe u ma qatle dhawın acle u dbi harayto jbir dımgalwe ma dukothayde. Ma 2003 mşarele golutho rabtho ume mınyono d’milyon u falge adyawma fayış belhude hedor 200 alfo mu man abne du camaydan bu Iraq.

ESU mawdacle leşan dmitaklıyo i frişutho, i tuxmonoyutho, u qatlo da qalilotho bu athro, u Iraq kıtle mşalutho nomusoyto dsoyım u garanti di mşaynutho da dukotho da camani u dmawde ba hawbe noşoye uba qtolcame dsimi aclaye. Kısaymina qroyto li şultonutho Iraqoyto dmawdiyo bu qtolcamo d’Simele u dmaydo mşalutho dımdafco u dsundo u camaydan bu athro dan abohothayde u di mdinoyutho dxlıqle u camaydan bu athro bu haqlo marduthoyo, kenşoyo, yulfonoyo u momunoyo. Calathe ESU kımathkır i ruho da Sohde du qtolcamo d’Simele u gıdmdawım ba fulhonayde dımşalıt bahro cali aykanoyutho du camaydan la hayle qlimoye u Emwothoye.