MUB frısle buyono bi ohnutho du duxrono du qtolcamo d’Simele

’Gıdmaqımina u sabro da Sohde du delqublo umthoyo d’Simele’ ba melani kımşare u buyono difrısla i Sictho di Rişonutho du Mawtbo Umthoyo d’Bethnahrin-MUB bi ohnutho du duxorno da Sohde d’Simele dıknofıl kul şato 7 b’Ob.

Bu buyonano MUB mırle; Şafıc 87 ışne calu qtolcamo d’7 Ob Simele dmıdle duktho du trajedi bu makthabzabno du camaydan. Mu siqumawo hol adyawma, i siyase du lhoyo u du tenkiro mqabıl du camaydan bşıkılat mşahılfe kımdawmo.

Bu şuroyo du buyonano difrısla i Sictho di Rişonutho du Mawtbo Umthoyo d’Bethnahrin-MUB kımahkıyo cali siyase du qşoco du camaydan dkimdawmo dio kloyo, ba qtolcame u ba komplowiye dsim acle. Griş u zuhoro calu yarho d’Ob dan 1933, aydarbo mahrıw ba casrowat d’qıryawotho du camaydan bu Iraq u sim u qtolcamo d’Simele.

MUB mırle; Şafıc 87 ışne calu qtolcamo d’7 Ob Simele dmıdle duktho du trajedi bu makthabzabno du camaydan. Mu siqumawo hol adyawma, i siyase du lhoyo u du tenkiro mqabıl du camaydan kımdawmo. A şultonwotho du Iraq qulnaqla sxıre caynothaye cali hiyoyutho, calu makthabzabno, cali ithutho marduthoyto u cala qtolcame d’Simele u d’Sorya.

Bebzabno MUB grışleste u zuhoro calu qtolğenso dsımwolın a ğrobe marhıbone d’Dacış calu camaydan ba 2014 u mırle; U kboşo d’Dacış b’10 Hziron cal Mawsal u 3 Ob mşahlıf l’qtolğenso cala Ezidoye, u 6 Ob’ste bu texliyo di daşto d’Ninwe ma comurayde mati li qımthayde. Ba qtolcamani mnase  dmıqşıc u camaydan man arcothaydan a mqadşe u dmılhoyo i ithutho du camaydan, u makthabzabnayde wi hihoyuthayde. I siyase di bcelıdbobutho dımqabıl du camaydan bu Iraq, Suriya, Lebnon u Turkiya ma hayle du statuko uma tuxmonoye, b’şıkıl mtakso u bı tahrazto maşyo.

MUB mırle; Calathe u ağuno dıkmaşena laşan i ithutho du camaydan u Suryoyo-Othuroyo-Kaldoyo’yo u dıklozım dmahwe delqublo mqabıl di siyase du lhoyo u dnofıq moro lu nushonayde u la timoytothayde. Xıd Mawtbo Umthoyo d’Bethnahrin u nişaydan dmaclena i otho du delqublo mqabıl da qente u da gzome dkowın calu camaydan. Hani dıksaymi tagorutho calu admo da sohdeydan dıqtili bu Sayfo, b’Simele u ba qtolcame hrene, u dıkxıdmi la bcelıdbobe, klozım dıdci; gıdşufci lu makthabzano xıd farsufe mancıle u xayın.

Bu huthomo MUB komır; I wolitho asasi du ağunaydan uda mothonoyaydan, dnıfqina moro lu delqublo umthoyo ulu sabro da sohde d’Simele, li demoqratoyutho u l’Bethnahrin i hırto, u klozım leşan du medano dmitahwe ağuno b’fedakariye. B’iqoro kmathkırina u yawmo şatonoyo da 87 eşne da sohde d’Simele, wu ağunathe kımdawım dmanhır u darbaydan u dhowe mabuco du haylo du Mawtbo Umthoyo d’Betnahrin.