ESU frısle egartho lu ray dı britho cali aykanoyutho di eqartho d’Diril

Bu insiyatif du Huyodo Suroyo d’Urifi ESU wi eqartho dı Şmuni u Hurmuz Diril, fris egartho ftıhto la şutose emwothoye, la şultonwotho u lu ray du tboco froso.

Bi egarthathe kmişalıt bahro cali sbutho du zawgo d’Diril, u kmıtlıb dmisım buqoro b’jiddiye u dmihaşwi a hayobe u Hurmuz Diril dmiqafe. 

İ egartho ftıho dı friso lu ray emwothoyo mıdyo me 37 şutose tukose du camaydan u Kaldoyo Suryoyo Othuroyo kmawdıco, a şutose dımdelın i egarthathe kıbci fılği u ğamathe, ksaymi qroyto, kımqadmi a talabathe cal sbutho dıkımdawmo dımmathro cala Suryoye – Othuroye – Kaldoye wu kenşo mşihoye b’Turkiya ubi golutho.

Bu yarho d’Konun u Haroyo ba 2020, u zawgo Hurmuz u Şmuni Diril htifiwo mi qrithaththe da abohotho Mıhre dkıtyo b’Şırnaq bu tayman madınho d’Turkiya. U zawgano i emo wu babo d’Qaşişo Remzi Diril u kohno di cito Kaldoyto bı Stanbul’ne.

Bıthır mıdımvayci, a nacime di eqartho dı Diril wa hawronaththe mşarelın ba fulhone leşan dıdci aykone Hurmuz u Şmuni Diril. Bıthır me tre yarhe bu siqumo d’20 Odor i eqartho mqafela i şlado d’Şmuni Diril, bu nahro dıkrohıq mowat metrowiye mi qritho. Cam gabıdathe Hurmuz Diril heş layto xabro mi ithuthayde u mvaycoyo.

Bi egartho kmitathkır, cam gabıd dhiw kmo maqırhonwotho dlatwo mede bınne  mi şultonutho du athro, lo sim fulhono bjiddi, leşan dmiqafe u qatolo d’Şmuni Diril u dmiqafe Hurmuz Diril. U taşroro du otopsi d’Şmuni Diril heş kmıtre ğnizo, i eqartho wa nacime wa hawrone d’Diril kıbci dyılfi i şrolutho.

Ba melani kmıhtyomo i egartho ftıhto da 37 şutose u tukose du camaydan, “Bıthır mıdımşarewole u maşıqlo du şlomo beyn di Şultonutho dı turiya wi PKK Şmuni u Hurmuz Diril daciri li qrithaththe i makthazabnayto u markawwolın a hayaththe.  İ eqartho d’Diril kımmathlo falqo mu mınyono du camo Kaldoyo Suryoyo Athroyo dıkzaydi dkıbci dıcri u markıwi ruhayye bu athraththe, kımhathıthi a dkothathe u dıkmasri ruhayye bu şırşaththe. U myodo d’nişo di eqartho dı Diril, i mdabronwotho Turkoyto lıkımqawyo a hayobe, kxodım u tezico da Mşihoye u kmarhıq hani dkıbci ducri lu athraththe.

Calu asasano ahna knıqlina ilo thnihoyuthaydan, u ktılbina mi wazirutho di kinutho d’Turkiya dobo fsoso lbuqoro dkıtyo zalilo, qriho, şariro udlowe ğnizo leşan dmımte l’netije, u hani dsımme u hawbano dmihaşwi. Ksaymina qroyto li wazirutho di Kinutho d’Turkiya dlo fırşono dı tawditho u etnikoyo lfuth du nomuso esonoyo d’Turkiya dsaymo harake“.