Fatıryarxo Al Raci grışle u zuhoro cal lumodo emwothoyo dilonoyo d’Lebnon

İ qadişutho du fatıryarxo di cito Suryoyto Marunoyto Mor Bşara Bıtrıs Alraci, mawdacle dlatne hadire dıtorın u athraththe d’Lebnon dmıdre qum d’cyanothaye udmaşlım ruheye la tarmyotho baroye.

Mawxaste, fatıryarxo Alraci naqla hreto grışle u zuhoro calu lumodo emwothoyo dilonoyo d’Lebnon, dkıtyo u foruqo du athro mkul haylo baroyo dkobıc dkobış i morutho du fusqonayde.

 “Hullema gıdhırmitu u camo mu zedoq du furqonayde mi casqutho dıkcaşla udımşaşwıt a’hayayde bu haqlo momunoyo u kenşoyo”. Ba melani fatıryarxo Mor Bşara Bıtrıs Alraci kımşayıl a’rişone folitiqoye d’Lebnon dşafici i muhle dımbayno laşan u şekolo di şultonutho hathto, u tlıble menaye dımşatsi şultonutho du wujdan, şultonutho dıkmahto u yuthrono du camo udu athro bi qadmoyuthayda.

U fatıryarxo di cito Suryoyto Marunoyto, bi koruzutho dsımle athmıl bi cito d’Yuldath Aloho bı Bkırki, mawdacle dlıkmıtlıb mu rişqutno Mişel Caun uloste mu rişwazire Sacd Alhariri dmanhıti katfo lıhdode, elo dhowelın dlo qetre diyalog u methcadronutho camıhdode, u mırle “u nfoqo du moro la woliyotho lıkmonıc dhowe rakixutho bi klayto awste fhomo lıhdode. Camıhbol u maşıqlo du şekolo di şultonutho mdarbıd dmışre, kul dkothe kıqoşe zıd, ukımathır bi netiçe camu momuno d’Lebnon wi mşaynuthayde, ukmakle a’fulhone da şutose ruşmoye gawonoye. Mawxa ulaşan u furqono d’Lebnon, sımwolan qroyto dmitayıb lumodo emwothoyo dilonoyo d’Lebnon bi rocyutho d’Emwotho Mahydotho. Latna hadire dıtrena u athro standard dımşataslan udıbnelan camıhdode udmawsaqlan lu darğo da emwotho mdinoye, d’nofıl ucdo qum di cıtmo udmaşlım ruhe la tarmiyotho baroye dkıtne mqabıl du jawhar di ithutho d’Lebnon. U lumodano lıgıdkobış u fusqono siyasi d’Lebnon, i moruthayde wi şaryuthayde, elo gıdmadlın midothıd da kaboşe u gıdmadcarlın naqla hreto li şultonutho, lu camo uli ruşmoyutho. U lumodo emwothoyo gıdmaqım i mudaxala baroyto dkımmathlo tırpılto lu fusqono athronoyo hiro u mkanşo u kımthabıt Lebnon xıd athro noytral. Ukfoyış bi harayto cal Emwotho Mhaydotho dımqafyo hiya u darbo qonunoyo, laşan dsaymo i wolitho dıkmıtlobo mena laf Lebnon dkıtyo i ithuthayde bu qento”.