Fatıryarxo Alraci krıhle u qedomo da rişone folitiqoye d’Lebnon dkıbci kamilo dımfarfısi u athro

I qadişutho du fatıryarxo di cito Suryoyto Marunoyto Mor Bşara Bıtrıs Alraci, krıhle u qedomo da rişone folitiqoye d’Lebnon dıkmahwe dkıtne b’fusqono kamilo dımfarfısi Lebnon xıd athro u xıd egartho di mdinoyutho.

Bebzabno, fatıryarxo Alraci dımakadle u snodayde lu qawmo camonoyo d’Lebnon, mawdacleste du camo gdımdawım dmahwe u mrodayde hul dmitadcarle u neshono dımvayacle b’Lebnon.

I qadişutho du fatıryarxo di cito Suryoyto Marunoyto Mor Bşara Bıtrıs Alraci, athmıl bi koruzuthayde d’yawme d’Huşabo, mawdacle du qolo d’aloho ktolıb ma mşale u rişone folitiqoye d’Lebnon dmaklın u teştıcınyo dıkmıştacın ba reğşe du camo udu athro udsaymile teşniqe. Bebzabno, fatıryarxo Alraci krıhle u qedomo da rişone d’Lebnon dkıtne b’fusqono kamilo dımfarfısi u athro, u sistemayde, u qyomayde, u dawrayde u makthabzabnoyo wi egarthayde bu haqlo noşoyo u mdinwoyo. Alraci mawdacle da rişone folitiqoye lıfayış kıbci şultonutho qentrunoyto b’Lebnon, elo ktıfki u camo dhuwe fayış dımdabır ruhe, u mawxa naqla hreto tlıble dmitayıb lumodo dilonoyo cal Lebnon bi rocyutho d’Emwotho Mhaydotho, bnişo dmitaxlıs Lebnon ma krize qlimoye dkito hedore, dmitadcıri a’galwoye Suriye lu athraththe ud’mışroyo i sbutho da galwoye Fleştoye.

Bebzabno, Mor Bşara Alraci makadle m’hatho u snodayde lu qawmo camonoyo d’Lebnon dkımmathıl u sabro du hethothayde udu turosayde, u makadle ste du camo Lebnonoyo walawste çrihoyoyo, elo naqla hreto gıdqaymi li rağlo, ugıdmahwın u mrodaththe, bnişo dmitadcarlın u neshonaththe wu neshono du athraththe Lebnon.

Camgabıdathe, u fatıryarxo di cito Suryoyto Marunoyto grışle u zuhoro calu furqoco du lmino d’Bayrut d’Arbıco Ob dkıtyo u nişayde tfoko da generasyone uda yaqrotho Lebnonoye li golutho, dmitaxle u kenşo mu haylayde ud’mımhe darbo li şawtofutho athronoyto bnişo dmitahıt ido cal Lebnon.