Sim qroyto l’Rusya u l’Amerika dmahwın klayto qrıhto ma hçome dıkseymo Turkiya calu garbay madınho d’Suriya

I mdabronutho yothoyto du garbiyo udu madınho d’Suriya, sımla qroyto l’Amerika ul’Rusya dmahwın klayto qrihto u msarhabto m a hçome haroye dıksaymolın Turkiya calu garbay madınho d’Suriya.

Camgabıdathe, mtayıb hfitwotho ba mdinotho dı Tabqa udı Der Ezzor mqabıl da hçome dıksaymolın Turkiya cali fnitho dı Tel Tamır, ubebzabno tlib dmitıctarıf emwothoyith bi mdabronutho yothoyto du garbiyo udu madınho d’Suriya.

I mdabronutho yothoyto du garbiyo udu madınho d’Suriya bu buyono dıfrısla adyawma lu ray gawonoyo dıbritho, sımla qroyto li şultonutho dı Darımsuq ula tre athrawotho dıksaymi u garanti di şalyuthzayno Rusya u Amerika, dmahwın klayto qrihto u msarhabto ma hçome haroye dıksaymolın Turkiya cala fenyotho dı Tel Tamır, Qamışli u Mabuğ. U buyono di mdabronutho yothoyto mawdacle dı Turkiya laşan dmarwıho i tarmithayda i kabışto ub’şıkıl dıkdoyış a’prensibe wa qyome emwothoye, hani zabno maqşela ub’şıkıl mtakso a’hçomayda cala fenyotho di mdabronutho yothoyto dımdafaclın ruhaye u britho kula mqabıl du tukoso marıhbono dı Dacış wa tukose hrene tuhmonoye radikaloye.

Camgabıdathe, i mdabronutho yothoyto mawdacla di mwatyutho folhoyto dı Turkiya kobo aftho l’Dacış dıdocır la haye m’hatho, ubebzabno kmaqşiyo u kriz folitiqoyo d’Suriya u kımhadıdo i hdoyutho d’Suriya.

Mxasra hreto, u mawtbo di claymutho du gabo du dactid d’Suriya mtayable lumıhreno taklitho du protesto mqabıl dı Turkiya bi mditho d’Raqqa. Bi taklithathe dmıştawtaflela claymutho u haylawotho di mşaynutho gawoyto, a’mıştawtfone krıhlın a’hçome dıksaymolın Turkiya cali mditho dı Tal Tamır ucali qastra d’Zarkan, ubebzabno mahwelın u snodaththe la haylawotho d’Suriya demoqratoyto d’QASAD.

Athmılste, u mawtbo du gabo du dactid d’Suriya mtayable halxo bi fnitho d’Alkasra dıknıflo hedor di mditho dı Der Ezzor bi mıştawtfonutho d’menyono celoyo ma mathlone da mawtbe mdinoye, gawoye u folhoye dı Der Ezzor. Bi taglithathe, a’mıştawtfone krıhlın a’hçome du gayso kaboşo dı Turkiya, u tlıblın ste dmitıctarıf bi mdabronutho yothoyto du garbiyo udu madınho d’Suriya.

M’gabo hreno, i wazirutho di baroyutho d’Amerika naqla hreto tlıbla mu rişono du rejim d’Suriya Başşar Alasad, dmagle cali tahraztayde du zayno kimyawi udımfarfasla kulonoyith lfuth a’cuhdone du kenşo emwothoyo. I wazirutho bu buyono dıfrısla bi dafayda, mathkarla ste du rejim d’Alasad bu noquso 50 naqlat mıstacmele u zayno kimyawi mqabıl du camo d’Suriya mu zabno dımşarewole u qrobo gawoyo bi şato da 2011. I baroyutho d’Amerika makadla ste d’Waşington ksındo b’haylo rabo a’fulhone dıksaymi u garanti dmimıd hşowo ma gunhe rabe mahişone dsımle u rejim mqabıl du camo d’Suriya, udıkşowe ğalabe menaye l’gunhe du qrobo ul’gunhe hrene mqabıl di noşutho.