Fatıryarxo Sako hawile ytawto camu waziro di baroyutho du Iraq

İ qadişutho du fatıryarxo di cito Kaldoyto d’Bobel Mor Luis Rofayel Qadmoyo Sako laqi cami taşdartayde b’Boğdod, u waziro di baroyutho du Iraq Fuad Husayn.

Bi ytawtathe dıgriş u zuhoro cali socurutho dsımwole u Papa, kleste cali ulsoyutho du şuhlofo da şbile yulfonoye, ucalu nfoqo du moro lan athare ula citotho makthabzabnoye bu Iraq.

U waziro di baroyutho du Iraq Fuad Husayn mıstaqbele athmıl, i qadişutho du fatıryarxo di cito Kaldoyto d’Bobel Mor Luis Rofayel Qadmoyo Sako cami taşdartayde dımşaklo ma hsayo Mor Basilyos Yaldo u Mor Robert Jırjis.Bi ytawtathe driş aydarbo kibe u Iraq d’qotıf a fire di socurutho du Papa Mor Fransis Qadmoyo lu athro, u dmıflıh leşan dmişahılfo i zıhniye wu renyo tuhmonoyo bu darbo du şuhlofo da şbile yulfonoye da madraşyotho.

Awkith a şbile du yulfono klozım dımayqri a zedqe noşoye, a gawne u hiyoywotho mşahılfe, u dfırsi a timoyotho du şbuqyo, di hubo udu iqoro beyn da bnaymothoye, bnişo d’ruğşi du Iraq u baytathe’yo. Beyn da fire’ste di socurutho du Papa klozım dmişawıt u haqlo du turist u dmihathıthi an athare du Iraq.Fatıryarxo Sako bu mamlayde, mawdacle du Iraq bethcatiqotho rabtho’yo dkibe d’gorış a socure, u dxolıq gade du fulhono.

İ qadişuthayde grışleste u zuhoro cali ulsoyutho dmitahwe yasifutho la citotho makthabzabnoye du Iraq, beynothaye i cito d’Kuxi dıkdocır u makthabzabnayda lu doro qadmoyo, i cito d’Al Aqaysar b’Karbalaa dıkdocır u makthabzabnayda lu doro hmişoyo wi cito d’Alxadraa b’Tikrit dıkdıcro lu doro şbicoyo.

Me gabo hreno, u waziro Husayn makadle cali ulsoyutho dmıftıh bethkrihe dilonoyto la farsufe dhzelın husrono du hulmono udi nafşo bi netiçe da hçome dsımwolın a marıhbone d’Dacış, dilonoyith a Ezidoye u ğer. Bu huthomo di ytawtathe, fatıryarxo Sako mahwele sabro dmitayıb lqoyto beyn di cito udi şultonutho du Iraq, bnişo dmıdrış aydarbo kibe dmimodi a yuthrone di socurutho dsımwole u Papa lu Iraq.

Mxasra hreto, u waziro di kinutho du Iraq Salar Cabdılsattar laqi athmıl u rişizgado Amerikoyo b’Boğdod Mattew Tueller ubi ytawto drişo i methcadronutho dbeynothaye bu haqlo du huquq, bnişo dmişawşıto i tahrazto di kinutho uda zedqe noşoye bu Iraq. Bi ytawtathe drişo’ste i ulsoyutho du tedciro dan athare Iraqoye dıkducri la dore mşahılfe di mdinoyutho d’Bethnahrin.