Fransa hadırtoyo dmahto zayne nukleer b’Urifi

FRANSA – I sferyawmo Britanoyto dı Daily Telegraph, bi mawdconutho dmatila ma mabucayda, maglela liholo dı Fransa hadırtoyo dmarkıwo bu athro d’Almanya tayisyotho du qrobo dıktıcni foqucwotho du nukler, in dothe dfısqo Amerika dgurşo a’haylawothayda mi qıtca d’Urifi. 

Lfuth i sferyawmo Britanoyto, mşalo Franşoyo dlımathkarle ışme mawdacle du froso dı tayisyotho folhoye Franşoye tacone du nukler ba n’arcotho d’Almanya latyo sbutho casqo, ubebzabno kımmathlo egartho qwitho l’Rusya. 

Camgabıdathe, farsufe Almanoye dkıtne hfite bu haqlo deblomasi, mawdaclın di dawsathe dkıcbo Fransa dımhalqola, kiba dıtıfko Britania ste dımhalqo cayni dawse b’Almanya. 

I sferyawmo dı Daily Telegraph, mathkarla ste du mraşho li rişwazirutho d’Almanya mu koalisyon du Huyodo Demoqratoyo Mşihoyo d’SPD Fredriş Mirts dkımdafıc i şaryutho d’Urifi m’Amerika, ksoyım qroyto l’Britania ulı Fransa dmaqwın udmarwıhi zıd u haylaththe du nukler, bnişo dımdafci i qıtca d’Urifi. 

Mirts bi maqıblonutho dsımwole acme u froshezwo d’ZDF, mawdacwole dkıtle keşlo b’Amerika bi rişonutho dı Donald Trump dgıdnıfqo moro li mudafaca mşawtafto dkito lfuth u qyomo du Nato, u mathkarwole dıklozım an’Urifoye dfılhi zıttır laşan dqıdri bu noquso dımdafci i qıtcaththe. 

I şabake da tebe d’NBC bu tebo dıfrıswola 20 bu yarhano, mawdacwola d’Amerika kmıftakro ucdo dmanqıso i şkihuthayda i folhoyto b’Urifi.