Fransa hule muhle laşan dmitarkıwo i şultonutho d’Lebnon

Fransa hula la rişone folitiqoye d’Lebnon muhle hul ramhıl, laşan dımbayni i şultonutho hathto.

 Camgabıdathe, u qoyumo da Druz Walid Junbulat mawdacle di muhlathe kımathlo i aftho harayto l’Lebnon. Ubebzabno, u rişwazire catiqo Sacıd Alhariri mawdacle dlıkowe u lo wazirutho dhuyo tırpılto qum du şekolo di şultonutho hathto.

 U rişqutno dı Fransa Emanuel Macron, hule xabro la mşale du şekolo di şultonutho hathto d’Lebnon, dkıtle mabco dmorıx i muhle dımbaynowole meqım lu şekolayda.

Lfuth i sferyawmo d’Alşarıq Alawsat, Macron mawdacle la mşale Lebnonoye du tewrixo di muhle hul ramhıl, gıdobe fsoso zıd laşan dhımci aşartat du şekolo di şultonutho hathto. Alşarq Alawsat mawdaclaste da nesore bayn dı Fransa wu rişwazire hathe Mustafa Adib dılo kloyo kımdawmi.

Adib bi maqırhonutho ihidoyto dıfriso bu tboco froso cal leşonıd dhın ma hawronayde mırle “ıno i klaytaydi lımşahılfo, u lıgıdhoweno ale du tworo da Şica awste dayna mathab dhowe ma mathabe d’Lebnon. U mede dkıtyo ulsoyo laşani dhowili methcadronutho cam kuleyo, bnişo dmaxlasno u athraydi”.

Camgabıdathe, u rişono da Druz d’Lebnon qoyumo Walid Junbulat bi maqırhonutho dıfrısle bi dafayde du Twiter, mzaharle arişone folitiqoye d’Lebnon di muhle hathto dımbaynole Macron kımathlo i aftho harayto l’Lebnon, u mırle “kmahwe kito hın dlıkfıhmi awste lıkıbci dfıhmi du insiyativ Franşoyo kımathıl i aftho harayto laşan dmitaxlıs Lebnon mu krizayde u dlımılhoyo i ithuthayde”.

Megabo hreno, u rişwazire catiqo Sacd Alhariri mawdacle dlıkowe u lo wazirutho ma wazirwotho d’Lebnon, dhuyo tırpılto qum du şekolo di şultonutho hathto, u mırle “i wazirutho du momuno u ayna waziruthoste dhuyo latyo mulkono dkıtyo masro cama Maşılmone Şica d’Lebnon”.

Mxasra hreto, u waziro di baroyutho d’Amerika Mayk Pompeo mzaharle Macron da fulhonayde dıksamlın laşan d’Lebnon kibın dnıfqi lu xalyo, ida dlımiqafe şroyo baroyo li sbutho du zayno d’Hizballa.