Fris kıthowo mqabıl du mgalyun qadişo bu athro du Iraq

U camaydan dmahzamle ma mdinotho du Iraq lu qlimo d’Kurdistan mcal fothe da Maşılmone tuhmonoye, ucdoste kmırdıf mi şultonutho du qlimo dıkımdacyo dkıtyo i nuqazto di hirutho tawdithoyto udi demoqratoyutho bu Iraq.

Bıthır mu kriz da msone dkıtwo tahtaye Slibe dımzabniwo b’Arbil, ucdoste mbarbız ba betharke du qlimo, kthowo dıkmlakıh i tawditho Mşihoyto.

U camaydan dmahzamle mi marhıbonutho lu qlimo d’Kurdistan du Ciraq cal dıkmıtyaqan’wo dkito ebe şıkıl di hirutho du renyo udi tawditho, adyawma kowe nişo la hçome da Maşılmone tuhmonoye du qlimo. Qentrun du tbocofroso b’Arbil dıkmidıc bu ışmo; u makıthbo du fuşoqo du tbocofroso, mawfaqle kthowo dıkmlakıh i Mşihoyutho u dkowe celtho lu froso du ruğzo udi bceldbobutho beyn da came du qlimo.

Bu kthowano kminase dmitawfıqi an 4 mgalyune di Mşihoyutho mi mıcnathe u kımdace dkito keşlo bi şroruthathe.U kathowo Riber Muhammad Xalil, kımdace dkito keşlo calu şerşo da mgalyune qadişe lfuth kthowe dfrisi me hın yadıcthone di theoloğiya du macırbo, ubebzabno kımdace dkito’ste keşlo ban 4 şlihe dıkthuwolın a mgalyune.

U hçomano kmıhşıw halıqto mi şişaltho da hçome dıkmisomi calu camaydan mu zabno dnafılwo u rejim ba 2003 uhulucdo. U hçomano dcalu camaydan dewam du hçomo dsımwo acle meqım 4 ışne’yo, bu zabno dımqafewo dukano b’Caynkawa dıkmzabnowa msone dkıtwo tahtaye Slibe nqişe.

U hçomano kmıhşıw dyoşo da zedqe noşoye uli hirutho tawdithoyto bu qlimo d’Kurdistan, u kampanya du hboso dıkmisım calu camaydan’yo, bnişo dımgalwe mu qlimo dkıtyo huwwe moro du cafrayde.