Fris tahwiyotho dıkmibıc dmıhjım cala haylawotho Amerikoye bu Iraq

 İwazirutho di gawoyutho du Iraq, bi tahwitho dıfrısla maglela cal tahrazto dıkmitaybo bnişo dmıhjım cal şırkat di mşaynutho u du lojestik dkıtne masre cama haylawotho Amerikoye bu Iraq.

Megabo hreno, ahaylawotho di mşaynutho du Iraq mqafelın 50 soruhe b’şıklat mşahılfe bu tayımno d’Kerxıslox.

Bi tahwitho dıfrısla i wazirutho di gawoyutho du Iraq, mawdacla dmatila mawdconutho ma istixbarat dıkmagılyo cal tahrazto du hjomo cala şırkat Iraqoye u nuxroye di mşaynutho dıkfılhi b’gawıd du athro.

Bi tahwithathe dımşadro la şırkat di mşaynutho kulle du Iraq, kmathkıro dkito plan dmisım hjomo cala şırkat di mşaynutho u du snodo lojistik dımdelın qyome cama haylawotho Amerikoye bu Iraq. Bi tahwithathe dıfriso athmıl, kmitathkırste a furşağne da şırkat di mşaynutho, ağensuwotho da falohathe wi tabica u şıkıl du fulhonathe.

I tahwitathe dımdele acla u rişono di mdabronutho da şırkat dilonoye di mşaynutho rabhaylawotho Fares Nadhem, ksaymo qroyto dmimıd tedbire u dmiqadım b’zuhoro ma hjome dkibe dhowın cala qentrune da şırkat di mşaynutho u cala falohathe.

I tahwithathe nafiqo liholo bu zabno dıkmisım eba hjome cal konvoye u kamyone matcıne mcadronwotho lojistik du koalisyon emwothoyo dkımrayşınole Amerika mqabıl Dacış.

Bebzabno, u zuhorano athi luhwoyo bıthır mıd a grube mzayne dkıtne masre camu İran mhadadwolın meqım dgıdsaymi hjome cal nuqazyotho u şutose Amerikoye bu Iraq.

Mexasra hreto, ahaylawotho di mşaynutho du Iraq bu duyoqo dsımlın adyawma bu tayımno d’Kerxıslox, mqafelın 50 soruhe m’şıklat mşahılfe u 300 foqucwotho cam tlotho qentrune du tloyo da marıhbone. Athmıl bu cuqobo dsımlın ahaylawotho Iraqoye dıknıfqi mqabıl di marıhbonutho, qtilın tıre rişone dı Dacış bu zabno dımnaselın dmahızmi, u msıklın tıre hrene bi qastra dı Daquq bu tayımno d’Kerxıslox.