Gıdmidıq u noquşo di cito qadmoyto dkamıl u hethothayda bu macırbo di mdito d’Mawsal

14 bu yarho d’İlul dıbqamuthayna, gıdmidıq u noquşo di cito qadmoyto dkamıl u hethothayda bu macırbo di mdito d’Mawsal.

Ucdo kımdawmi a fulhone du tehito du noquşo hatho cali qubtho di cito d’Mor Tuma Şliho da Suryoye Qatholiqoye, leşan dmidıq inaqla qamayto bıthır mıd kbişowa Mawsal ba 2014 mu tukoso marhıbono d’Dacış.

14 bu yarho d’İlul bu zabno da hfitwotho du cedo du Slibo, gıdmidıq u noquşo di cito d’Mor Tuma dkamıl u hethothayda bi mdito d’Mawsal du Iraq. U kohno di cito d’Mor Tuma Şliho da Suryoye Qatholiqoye qaşişo Byos Caffas, bu mamlo dsımle la dafe du camaydan mawdacle, du noquşo hatho di cito mşadır me Lebnon u maslım li cito d’Mor Tuma b’Mawsal dıkmıhşowo i cito qamayto dkamili ucdo a fulhone du hethothayda bu macırbo di mdito bıthır mu maşıqlo du kboşo d’Dacış.

İ cito d’Mor Tuma ba surotho dfrısla bi dafayda du facebook, maglela cala fulhone dıkmisomi ucdo bu terkiwo du noquşo hatho cali qubtho di cito, bnişo dhowe mtaybo meqım mıd mitacwıd 14 bu yarho d’İlul dıbqamuthayna dkıtyo u cedo du Slibo. A grube marıhbone d’Dacış bu zabno dıkbışwolın Mawsal, şmıtwolın a slibe wa noquşe da citotho u madranwo.

Uba 2015, frıswole Dacış vidyowiye u surotho ba dafayde dıkmahwewo ebaye u tehriwo da slibe wu tedriyo da noquşe da citotho d’Mawsal, beynothaye di cito d’Mor Tuma wu noquşo di cito d’Mor Gorgis. U noquşano dkıtyo u yuqrayde 285 kilowiye, u timayde 12 alfo dolare’yo. Mxasra hreto, a hfite da dafe du nawlo d’Mawsal beynothaye mu camaydan, ba vidyowiye dfrıslın, maglelın calu tehriwo da bethqbure mhayde du camaydan dkıtyo bi fnitho d’Wadi Cıgab b’Mawsal.

Ba vidyowiye kmahwın a çemçmyotho da canide, a şladathe wa sniqwotho dıkmıstacımliwolın bu zabno dkıtwın heş ba haye. Calathe, a hfite sımlın qroyto li mdabronutho gawoyto di mdito uli şultonutho du Iraq dmahwın yasifutho la bethqbure du camaydan dıkdocır u makthabzabnayda l’alfo eşne, ubı şıkıl dıkşowe lu neshono da mithe.