Gıdmitayıb bu darbo du nawlo lumodo tibeloyo cali musiqi Suryoyto

17 bu yarhano d’Odor, gıdmitayıb bu darbo du nawlo lumodo tibeloyo cali musiqi Suryoyto wu tathir dhawila cala marduwotho ucala cyode da came hrene.

Lu lumodano dgımdawım hamşo yawme, gıdmıştawtafle yadıcthone bu haqlo di musiqi udi yortutho Suryoyto me athrawotho mşahılfe dıbritho.

 Bu siqumo d’17 uhul 21 bu yarhano d’Othır, gıdmitayıb bi mditho d’Çenev d’Swisra, lumodo tibeloyo bu darbo du nawlo calu cyodo di musiqi Suryoyto wu tathirayde cala cyode u marduwotho hrene. U lumodano kmitayıb mi madraşto celayto di musiqi d’Çenev HEM umu şutoso d’Laus Plena Foundation d’Lugano d’Swisra.

A’fulhone du lumodano gdımşarın kul yawmo bi şuctho da 12 d’safrayto huli şuctho da 3 d’casriye ba tre leşone Franşoyo u Englişoyo. U acmaye ste gıdhowe hfitwotho u hage di musiqi dgıdmıfrosi ma mdinotho d’Çenev Swisra, Mırde Turkiya, Bağdede Ciraq, Jbel Lebnon, Kotayam bu Hınd u gıdmitayıb ste hfitwotho b’Hollanda.

U lumodano kıtle u nişo dmıxlıq aftho laşan dhowe droşe u nuqoşe bayn d’17 yadıcthone bu haqlo di yortutho Suryoyto di musiqi wu tathirayda cala cyode u mardıwotho hrene musiqoye. U lumodano gıdhowe ftiho la mathlone du camo Suryoyo bı britho, la yolufe di madraşto d’HEM di musiqi uda botaysawbo şorikayda, u lkul farsufo dkıtle yasifutho.

Bu lumodano gıdmıdrış arbac sebwotho dkıtne: a’mabuce di musiqi Suryoyto wu şuşotayda, a’diloyotho di musiqi Suryoyto, u tathir dhawila u mıqqa ste hiyya m’athro ma cyode u marduwotho hrene wu nfoqo du moro li yortutho di musiqi.

Mbayn da mtargımone yadıcthone dgıdmıştawtıfi lu lumodano kito: Dr. Jıbrayel Aydin mu inistitut di musiqi Suryoyto d’Amerika, Dr. Sebastian Brock mi bethsawbo d’Xford d’Britanya, malfono Nuris İskandar dkıtwe u mdabrono catiqo du inistitut di musiqi madınhoyto d’Suriya, Dr. Enriko Fink mi madraşto d’Şima da yulfone Yudoye d’İtalya u Dr. Alyas Kısırwani m’Lebnon u ğer.