Ğrob d’arkeolog Almanoyo mqafele bethqbure u athare catiqe bi mdito d’Ashur bu garbyo du Cıraq

ASHUR, Ciraq — U ğrob d’arkeolog Almanoye mqafelın qabre dkibe falqe d’garme, athare u alat du tino bi mdito makthabzabnoyto d’Aşur-dmahto’wa cal ışme du aloho Aşur. A hfaryothani du ğrob dan arkeolog simi bu kordinasyon di wazirutho di mardutho du Cıraq. U mşalo dcali dukthathe-Salem Abdullah mawdacle, du ğrob dan arkeolog kşıflın mede dilonoyo bu zabno da 3 eşne dıkmaşın hfaryotho bi mditathe.

Kull şato, folahwo u ğrobani 2 yarhe bi dukthathe leşan dqodır dımqayıd a buhone dsımle. Ba hfaryothani, mqafe u mede dfayış me garme dfarsufe. Elo u şwolo latyo belhude u kşofo da garmani-a athare mqafın b’3 taboqe tahte di arco. U qabro qamoyo mu zabno di mamlaxtho da Parthian-du İran d’adyawma’yo. U trayono, mi mamlaxtho da Helen-Seleucid’yo awkith da Yawnoye.

U qabro haroyo u camuqo dkulle’ste mu zabno di mamlaxtho dan Othuroye’yo. U mşalo dcali mditathe-Abdullah mırle; U mede ulsoyo lahna, dqudrina dmotina lu nubco di mdito’yo. Hathe gıdmşalto bahro calu dawro rabo di mamlaxtho dan Othuroye-xıd nuqazto ulsoyoto hem bu haqlo marduthoyo u hemste folitiqoyo.

U tukoso Emwothoyo di Yortutho-UNESCO mşadarle taşdarto li mdito u mhanelın a fulhone dsimi u tlıbla baroyo, dmihathıth u ziggurat d’Aşur dhzele husrono rabo ma zalzalat uma mattre dnahiti. İ mditathe d’Aşur kıfayşo qarıwto lu nahro d’Deqlat bi hiğmonutho d’Ninve qariwo l’Şarqat. İ mditathe hawyo’wa i arişkoyto qamayto-tawdithoyto u folitiqoyto di mamlaxtho dan Othuroye ba eşne fsihutho.