Guteres mawdacle du virus d’Corona kriz noşoyoyo dıkmişahlıf b’surhobo l’kriz d’zedqe noşoye

U notarrozo gawonoyo d’Emwotho Mhaydotho Antonyo Guteres, mawdacle du kewo du virus d’Corona kriz noşoyoyo dıkmişahlıf b’surhobo l’kriz d’zedqe noşoye.

Bebzabno, Guteres mzaharle du kriz d’Corona kibe dmitıstacmıl xıd celtho laşan dmimıd tedbire du dyoşo bıhaq da kenşe mhile dlatlın haylo.

U notarrozo gawonoyo d’Emwotho Mhaydotho Antonyo Guteres, bi egartho dıfrısle adyawma bu video mırle “kito furşono dıkmisım bu haqlo di mşablonutho gawonoyto bi sbutho du kewo d’Covid-19, ukitoste hiyerarşi dılo şawyutho dkowe tırpılto qum di mşablonutho”.

Be bzabno, Guteres mawdacle du kriz d’Corona trele tathir mrimono cal hın kenşe, a’grube u kenşe mhile dlatlın haylo midi li ido xıd nişo, u mamlo di bceldboboyutho nafıq liholo wa tedbire qaşye di mşaynutho hawın qento cal dıkolın b’qamuthıd di mşablonutho du hulmono.

Guteres bi egarthayde mzaharleste di mothonoyutho tuxmonoyto, i camonoyutho, u dyoşo wu nfoqo mqabıl da zedqe noşoye dzayidi bhın athrawotho, kibın dmitıstacımli bu kriz d’Corona xıd celtho dmimıd tedbire du dyoşo dlatlın asirutho camu kewo di Corona.

U notarrozo gawonoyo d’Emwotho Mhaydotho dlımbahasle cal ışmone d’athrawotho awste gabe folitiqoye, makadleste da şultınwotho klozım dımqadmi b’şafyutho li sbutho d’Corona wa tedbire dıkmaydilın klozım dhowın qonunoye u dılo furşono.

Guteres mırleste “i egartho qrıhtoyo, a’noşe wa zedqaththe klozım dhowın bi qadmoyutho”.

B’gawıd du krizano d’Corona, u camaydanste u Suryoyo-Othuroyo-Kaldoyo kibe dloqe husrono, cal dkımmathıl ha ma kenşe mhile dkulle ham b’gawıd da n’athrawothayde bı Bethnahrin uhamıste ba n’athrawotho di golutho.