Hala Jarboc mnaqyo dayonto lu bethdino d’Michigan

Bi maqırhonutho dhuwle u senato d’Amerika mawdacle, dımayadle u renyo du rişono Donald Trump dımraşahwole Hala Jarbouc xıd dayonto federal du bethdino d’Michigan.

 I diloyto du tebanoste, d’Hala Jarbouc man abne du camaydan u Kaldoyo di mditho d’Telkepe du Iraq’yo.

Lfuth i maqırhonutho dıfrısle athmıl u senato d’Amerika, m’ayadle d’Hala Jarbouc dhuwyo dayonto federaloyto du macırbo d’Michigan bıthır mıd mraşhowa bu yarho d’Odor dı şafıcina mu rişono Donald Trump.

Bi mawdconutho dhuwla i rişizgadutho d’Amerika b’Boğdod mawdacla, d’Jarbouc hawyo i athto Kaldoyto qamayto dımnaqyo li wolithathe. Jarbouc mawlıdowa bi qritho d’Telkepe elo bı cımro nacimo, mgalwewola i iqarthayda l’Amerika.

Jarobuc maşela fulhone frişe bı zabno d’20 eşne; beynothaye xıd dayonto du bethdino di fnitho da 6 d’Michigan, mcadronitho du mqımdino d’Oakland wu ğer wolyawotho hrene bu haqlo di kinutho u kmiyaqro ma hawronayda du şuğlo.