Hawi hfuxye emwothoye mqabıl di siyase di şultonutho d’Turkiya

İ rişathwazire d’Almanya Angela Merkel, mawdacla da fulhone lo qonunoye dıksaymolın Turkiya bu madınho du yamo Mescoyo, fulhone bcelıdboboyene.

 Mxasra hreto, u mşalo catiqo bu pentagon Maykel Roben, mawdacle di siyase du şuhlofo demoğrafoyo dıksaymola Turkiya bu garbiyo d’Suriya, mşarelaste dsaymola bi fnitho du Qafqaz dıkmitaxılyo ma Mşihoye, udıkmitahıt b’dukthaye jatawiye me Suriya.

 İ sferyawmo Yawnoyto d’Kathemrini, mawdacla di rişathwazire d’Almanya Angela Merkel bu mamlo dsımla athmıl, mathkarla dlımşarır dawse rabtho ba nesore bayn du Huyodo d’Urifi u Turkiya xıdu mede dabici. Merkel bu mamlo dsımla bu knuşyo du nawlo da sicotho da sebwotho Urifoye ba parlamento mırla “Turkiya ksaymo fulhone bu madınho du yamo Mescoyo dkibın kyono ğalabe bceldboboyo awste kibi dımmono dkıtyo hurhoşo”. Merkel dmathkarla du tedciro di sfitho Turkoyto du duyoqo d’Uruç Rayıs lu lmino d’Antalya dawse tawtoyo, grışlaste u zuhoro cala fulhone dkımdawmo Turkiya dsaymolın mqabıl da sforyame d’Qufrus.

Megabo hreno, u mbahnono wu mşalo catiqo bu pentagon Maykel Roben bi mimartho dıfırsole bi mğaltho Amerikoyto The National İntrest, mawdacle du rişono du rejim dı Turkiya Receb Tayip Erdoğan kmıstacmıl i warqo da galwoye Maşılmone Sunna d’Suriya bu qrobo demoğrafoyo dıksamle mqabıl da qalilwotho umthoye dkıtne lawğıl dı Turkiya u larwal du athro, bnişo dımhaqıq yuthrone folitiqoye d’ruhe. Roben kmawdıc d’Erdoğan knoqıl a’Caraboye Sunna d’Suriya lu garbay madınho d’Suriya yaste la fenyotho da Calawiye bu qlimo d’Hatay b’Turkiya xıd şart laşan dqathlın i ğensoyutho Turkoyto, u dlımıjbori dfayşi b’gawıd da maşıryotho da galwoye. Wu medano ksamle Erdoğan bnişo dmişahılfo i demoğrafya da fenyothani laşan i manfaca du gabayde d’AKP. Roben bıqrihutho kmawdıc d’Erdoğan kımmaşe i siyase du qtolğenso b’Suriya, bnişo dmawfıq a’Kurdoye, a’Mşihoye wa Yezidoye u dmahıt b’dukthaye Caraboye Sunna. Bebzabno, u mbahnono Amerikoyo Roben mawdacle d’Erdoğan cayni strateji ucdo kmafıtle la haye bu qrobo d’Nagorno Qarabax, awkith kobıc dmahıt jatawiye Suriye b’dukthıd da fenyotho dmaxlın ma Mşihoye.

Mexasra hreto, i rişathızgado d’Amerika bu Nato Key Hachinson tlıbla me Anqara dmıftakro tarte naqlat meqım mıdmafito la haye u sistem da soruhe Rusoye S-400, u mırla “u qedomo dı Turkiya bu madınho du yamo Mescoyo u bu qlimo d’Qarabax kımhadıd i hdoyutho du Nato”.