Hawi hjome cali foqudutho d’Taji bu Iraq

Nafıl mınyono celoyo d’soruhe lawğıl di foqudutho d’Taji bu Iraq. I foquduthatheste, ksaymo baytoyutho la folhe du koalisyon Emwothoyo dıkmısnıd me Amerika.

 Hathe da 2 naqlat bıgawe di şabthathe’yo, dıkmımhe soruhe bi foquduthathe. Bu hjomo qamoyo dsımwo yawme d’Arbco dı şafıcina, qtılwo 3 folhe; beynothaye 2 Amerika.

Lfuth mabuce da hayle di mşaynutho du Iraq, adyawma ba şoce d’safrayto, mido naqla hreto i foqudutho folhoyto d’Taji du Iraq nişo l’10 soruhe dmafiri eba. U mede dıkgorış u zuhoro, du hjomano sim b’safrayto ulo ba şoce du lalyo. Holucdo heş latyo idico, en da hjomani huwlın husrono la folhe Amerikoye udu koalisyon Emwothoyo.

Bebzabno heş latyoste idico, hayna haylene bıthre da hjomani dcali foqudutho d’Taji. U mhoyano, hawi da 2 dıkmisım bıgawe dıkmo yawme. Awkith yawme d’Arbco dışafıcina, mhewo naqla hreto soruhe bi foquduthathe dkıtyo 20 kilometre bu garbyo d’Boğdod.

Bi netiçe qtılwo 2 folhe Amerikoye uha Britanoyo u xıd funoyo mqabıl du hjomanoste, sımwola Amerika cuqobo bu Iraq dhawi celtho lu qatlo d’6 Iraqoye.Woşington thımwola Kataib Hezbollah dıkmısnıd mu İran bu tuyobo du hjomano.

Mqabıl da hjomani d’Amerika, mahwela Boğdod hfuxyo u mawdacla, dhano dyoşo di moruthaydayo uba hjomani, qtil 3 folhe Iraqoye, 2 powelıs u mdinoyo qtili u calatheste tlıbla ytawto cama mşale Amerikoye. İ sagiyoyutho di mwatyutho dhawyo beyn Amerika udu İran, ban arcotho du Iraq hawın.