Hawi şalyuth zayno beyn Armenya u Azerbaijan

Armenia u Azerbaijan makadlın, dmatın lawyutho cal şalyuthzayno calu kriz d’Nagorno-Qarabax. Mawdıc di şalyuthzaynatheste, adyawma mşarela bu qlimo.

 U tebano fris, bıthır mıd a wazire di baroyutho da 2 athrawotho hadıriwo lı ytawto dımdawamwola 10 şoce camu rişono d’Rusya Vlademir Putin b’Mosko.

Bi ytawto dhawyo athmıl bi mescoyutho du rişono d’Rusya Vlademir Putin b’Mosko, a wazire di baroyutho d’Armenia u Azerbaijan drışlın cali aykanoyutho du qlimo d’Nagorno-Qarabax. A droşani dımrayşıni mu waziro di baroyutho d’Rusya Sergej Lavrov, mdawamlın zabno d’10 şoce, u bi harayto matın a mathlone d’Armenia u d’Azerbaijan lawyutho dmarkıwi şalyuthzayno bu qlimo.

U waziro di baroyutho d’Rusya Sergej Lavrov mawdacle, d’camgabe di şalyuthzaynathe dfayito adyawma la haye, a 2 gabe mıtafqiste dımşahlıfi a yasirathe u dmitadcıri a şlade da qtiloyathe. Lavrov makadleste da 2 gabe matın lawyutho dmabdın droşe camhıdode, bnişo dmisafe u krizano. A ytawyothaniste gıdmisomi bi mescoyutho du Ğrob d’Minsk u mawdıc, dmabdeleste a droşe dcama rişone d’Armenia u Azerbaijan.

Elo a wazire di baroyutho d’Armenia u Azerbaijan, lo huwlın maqırhonutho cala droşani dhawın b’Mosko. Bebzabno u tukoso Emwothoyo du Slibo Semoo gdımcadır a 2 gabe bu haqlo da fulhone noşoye. Ba taxtuşani dımşarewolın beyn Armenia u Azerbaijan 27 bu yarho d’İlül dı şafıcina, qtil ba mowat dıbnaynoşo. A droşani dhawın beyn Armenia u Azerbaijan b’Mosko, hawınste a droşe qamoye dsimi beyn da 2 gabe mu zabno dımşarele u krizano beynothaye.

Bu qrobano dcalu qlimo d’Qarabax dıkmdawım mi şatoo dan 1991, qtil hol 30 alfo bnaynoşo u maklewo ban 1994 bi şalyuthzayno dsımwo. Ba taxtuşe haroye dıkmdawmi hani 2 şabe, Azerbaijan mawdacla dı qtil 31 mdinoye uhol 168 mçarhi elo lo huwla mawdconutho cala folhayda dı qtili. İ mdabronutho d’Qarabax’ste maglela dı qtil 376 ma folhayda u 22 mdinoye.