HBA mtayable ramşitho bi cohnutho du yawmo şatonoyo du qtolğenso du Sayfo dana’1915

U gabo du Huyodo d’Bethnahrin Athroyo d’HBA du Iraq, mtayable ramşitho bi cohnutho du yawmo şatonoyo du qtolğenso du Sayfo da na’1915.

Bi ramşithathe dımtaybo bi daşto d’Ninwe bu garbiyo du Iraq, sim mamlo rwiho, u qre mimre calu Sayfo, u maqımste teşmışto cali ruho da sohde.

 I mditho d’Bağdede di daşto d’Ninwe dkıtyo i erişkoyto di Suryoyutho bu Iraq, athmıl dkıtwe 15 bu yarho d’Hzirın u duxrono du Sayfo, sımla baytoyutho l’ramşitho dımtaybole u gabo du Huyodo d’Bethnahrin Athroyo d’HBA bu salon d’Margonitho bı Bağdede. Li ramşithathe, mıştawtafle u rişono d’HBA Yusıf Yacqub Matti cama hadome di mdabronutho du gabo, nahire u mathlone d’şutose u kunoşo mu camaydan d’Bağdede.

I ramşithathe dımqadmo mu gelyunoro Salah Sarkis u malfonitho Ronak Hanna, mşarela b’qatinto d’şetqo cali ruho da sohde du Sayfo, ubıthır nqişo i sogitho mothonoyto du camaydan.

Bıthır mathe, u rişono d’HBA Yusıf Matti bu mamlo dsımle mahkele bırwihutho calu maşıqlo makthabzabnoyo ucali çuğrafya dsim eba u qtolğenso du Sayfo, u grışle u zuhoro cala came dıhzelın mena husrono rabo. Matti hule ste mawdconutho rwihto cala mtaybone u sayome du Sayfo ucala celotho dımşalıt u Sayfo du qtolğenso calu camaydan ucala came Mşihoye hrene dıkhoyanwo bu qlimo d’Anatolya b’Turkiya bu zabno di mamlaxtho Cuthmanoyto. Camgabıdathe, u rişono d’HBA tlıble mu kenşo emwothoyo umi şultonutho du Iraq dmawdın bu qtolğenso du Sayfo xıd mawdelın ebe ba casrowat d’şultınwotho u athrawotho bı britho.

Bi ramşithathe, an’omure du camaydan mqalaslın i gaborutho wu mrodo dmahwewolın a’sohde du qtolğenso du Sayfo d’athi brişıd du camaydan u Kaldoyo Suryoyo Othuroyo, baynothaye mimro bu leşono Suryoyo dımqadamle omuro Ramzi Hırmız Yako, u tre mimre hrene bu leşono Caraboyo dımqadmi m’omuro Kerim İna u omurto Cabdalla Nuri.

Bu huthomo di ramşithathe, menyono ma şamoşe mqadamlın teşmışto cali ruho da sohde du Sayfo.