Mtayıb hfitwotho bu yowmo du duxrono du Sayfo bı dkotho mşahılfe

Bi mdito d’Pohlheim bu qlimo d’Giessen d’Almanya, mtayıb hfitutho ruşmoyto qum di qoyumtho du Sayfo da Suryoye bu wahdo di karxutho d’Pohlheim.

Bebzabno ba citotho d’Delbrük, d’Gutersloh udı Delmenhorst mqadım ste teşmışyotho u sim mamle calu qtolğenso mayiro dhawi calu camaydan mi mamlaxtho da Cuthmanoye.

Athmıl dkıtwe u duxrono da 106 ışne du Sayfo dan 1915, mtayıb hfitutho qum di qoyumtho du Sayfo da Suryoye bi karxutho d’Pohlheim d’Gissem d’Almanya. İ hfituthathe mtaybo ma tloth citotho d’Pohlheim-Mor Eliyo, d’Mor Afrem u Mor Theodoros wi cito d’Mor Had b’Şabo, ubi methcadronutho du Huyodo Suroyo d’Urifi ESU wi claymutho Suryoyto dkıtyo hfitto ba gabe folitiqoye d’Almanya CDU u SPD.

Li hfituthathe mıştawtafle mşale Almanoye, u mathlone mu Huyodo du Quyomo da Qıryawotho d’Turabdin-DETA, mu hudro d’Turabdin Babylon, mu Huyodo da Neşe d’Bethnahrin-HNB, mu hudro Suryoyo d’Almanya u menyono dmıştawtfone. Bi tahrazto di hfituthathe’ste sim mamle me farsufe u folitiqore frişe wa kohne wa şamoşe mtayablın teşmışto cali ruho da Sohde du Sayfo bu leşono Suryoyo u Almanoyo. U rişono di karxutho d’Pohlheim cam qaşişo Lahdo Aydin mahıtlın klilo d’warde cali qoyumtho du Sayfo.

Meqım 4 ışne, u parlamento d’Pohlheim wu rişono di karxutho mawdewolın bu Sayfo dsımwo calu camaydan bu zabno di şultonutho Cuthmanoyto. U meqım 2 ışne, maqımwo qoyumtho du Sayfo bu wahdo di karxutho d’Pohlheim dıkhoye eba sagiyutho mu camaydan u Suryoyo. Me gabo hreno, bi rişonutho du hasyo di marcitho d’Almanya Mor Filiksinos Mattyas Nayış ucama kohne; qaşişo Şamcun Bagandi u Xuroyo Samuel Gümuş mtayıb u duxrono da Sohde du Sayfo bi cito d’Mor Malke d’Delbruck d’Almanya.

Camgabe di teşmışto dımqadmo, sim’ste mamle frişe cali ulsoyutho du nfoqo du moro lu Sayfo dan 1915. Bi cito d’Yuldath Aloho d’Gütersloh maqımle qaşişo Daniel Gök teşmışto cali ruho da Sohde ubi cito d’Mor Yuhanun da Kfone b’Delmenhorts’ste mathkıri a Sohde wu hasyo dan esore baroye di marcitho d’Almanya Mor Yuliyos Hanna Aydin sımle mamlo calu qtolğenso barbroyo dsımwo calu camaydan bu zabno du qrobo qamoyo dbritho.