Hiw u fağro qamoyo la tloye b’Yurdnon

A nacime da yaqrotho Suryoye dkıtne galwoye b’Yurdnon, mqadamlın lu rozo du qurbono qadişo d’Moran Yeşuc Mşiho.

Bi cito d’Yuldath Aloho di Mırto d’Alkarmel b’Camman, hedor 30 nacime Suryoye galwoye hiw elaye u fağro qamoyo b’zawho dımrayşanle u hasyo di marcitho d’Mawsal da Suryoye Qatholiqoye Mor Yuhanna Bıtrıs Muşe.

Yawme d’Huşabo dşaficina, mtayıb tekso dilonoyo du fağro qadmoyo la nacime da yaqrotho Suryoye dkıtne galwoye bi erişkoyto d’Yurdnon Camman. U zawho du fağro mqadşo sim bi cito d’Yuldath Aloho di Mırto d’Alkarmel da Latinoye bi rişonutho du hasyo di marcitho d’Mawsal da Suryoye Qatholiqoye Mor Yuhanna Bıtrıs Muşe, ubi methcadronutho d’qaşişo Tha’er Cabba dkıtyo u kohno di cito d’Yuldath Aloho di Mırto da zarce da Suryoye Qatholiqoye d’Camman.

U zawhano dmıştawtaflele menyono celoyo ma yaqrotho galwoye du camaydan b’Camman, mşarele camu cboro d’27 nacime abne u bnotho camu hasyo wu kohno wa şamoşe di cito, u baroyo mşarele u tekso du qerowo alohoyo. Bıthır mu mamlo dsımle qaşişo Tha’er dımqadamle ebe tawdiyotho lu hasyo Yuhanna Muşe, ha ma n’abne galwoye du camaydan bu mamlo dsımle bışmıd di marcitho mırle “ahna dlo mu sebyonaydan mgalwelan mu athraydan mu Ciraq mfothıd da şartat casqe dşafıc ebaye. Elo cıl ma casquwotho di golutho, da qetrayda uda teşniqayda, naqla hreto Aloho kroşım laşanayna a’dawsataydan”.

A’27 nacme bıthır mdızmırlın qole citonoye, hasyo Bıtrıs Muşe bu mamlo dsımle la hadire mırle “u athro kfoyış cazizo cala lebawothaydan, u ahna masrena ebe cal dıktıcnia cuhdone mene, elo a’şartat ne bi harayto dıkhıkmi u farsufo. Ahna xıd Mşihoye britho kula u cafraydan yo, cal d’Mşiho egarthoyo bayn duktho dhowe eba u farsufo”.

Bu huthomo du zawhano, u hasyo wu kohno hulın u fağro qamoyo la 27 nacime da yaqrotho Suryoye dkıtne galwoye b’Camman.