Hol alfo u 400 yolufe d’tmone madırşotho dan Armınoye bu taymno di marcitho d’Kalifornia, mtayablın hfitutho d’halxo leşan dmıtlıb kinutho u  dımathkıri a Sohde du qolğenso dan 1915

AMERIKA – Leşan dmathkıri u milyon u falge d’Armınoye dqtiliwo dlo rahme mi mamlaxtho da Cuthmanoye bu zabno du qrobo qamoyo dbritho, mıştawtaflın 1.400 yolufe d’8 madırşotho d’Kalifornia d’Amerika li hfituthathe dhadırla’ste a mşale wa malfone u malfınyotho da madırşothani leşan dmıtlıb mawdyonutho Emwothoyto kamılto u kinutho la dıbhe du qtolğensano dan 1915.

İ hfituathe mtakso’wa mi madraşto d’Mesrobian u mdawamle u yawmo kule u mşarela b’zawho ruşmoyo ubı slutho dsimo. A mıştawtıfone kulle’ste kıtwo aclaye t-şırto dkıtwo kthiwo acla; Ha qolo, ha ağono, ha dactith. Bıthır’ste mahıt klilo d’warde qum di qoyumtho du qtolğenso u sim mamle frişe me mşale da şutose dan Armınoye, di marcitho u mşale da madırşotho.

Me gabo hreno an Armonoye b’New York d’Amerika, mtayablın b’Times Square u duxrono şatonoyo da 110 eşne du qtolğenso dsımwo aclaye ban 1915. Li hfitutho dımtaybo me mınyono celoyo d’şutose dan Armınoye b’Amerika, dhadırla’ste mınyono celoyo d’claymutho, camo, mşale tawdithoye dan Armınoye, tlib dhowe mawdyonutho bu qtolğensano. Camani’ste u senator d’New York Chuck Schumer, u hadomo di kongre d’Amerika Frank Pallone u Senator Andrew Gounardes sımlın mamle calu qtolğenso.

Schmer dkıtyo Yudoyo, mawdacle dkodıc towo u mede dıkcayşi an Armınoye, cal dan abohothayde’ste mafitiwo bu Holocaust u mırle; Ono hol dothe meni, lıgtoreno da Turkoye dtocın u mede dsımlın. Camhıdode kiban dnufqino moro lu cuhdono dan abohothaydan dqtiliwo dlo rahme. Pallone’ste bu mamlayde mathkarle u qtolğenso dan 1915 wu qtolcamo dhawi’wo bu qlimo d’Qarabax calan Armınoye.