HRW thımla Azerbaijan ba rdufye dsımla mqabıl da Armınoye

U tukoso Emwothoyo da zedqe noşoye thımle athmıl a hayle d’Azerbaijan dmaşelın cnufyo qaşyo mqabıl da hayle Armınoye bu qrobo dhawi beynothaye b’Nagorno Qarabax.

 Bı tebo hreno dıfris calu qlimano d’Qarabax mawdıc, dhol 900 marhıbone Suriye noqufe d’Turkiya dımharbiwo hol ucdo cama hayle d’Azerbaijan, daciri ucdo naqla hreto l’Suriya.

Human Rights Watch-u tukoso da zedqe noşoye maglele cala ithbate dmatın lidothe cala hawbe dsımlın a hayle d’Azerbaijan mqabıl da hayle Armınoye bu qlimo d’Nagorno Qarabax. Bu video dmati lu tukoso Emwothoyo u dıfris bu tboco froso kenşoyo hani 2 yarhe, kımahıwyo i barbroyutho da hayle d’Azerbaijan.

U tukoso da zedqe noşoye mawdacle, da hayle d’Azerbaijan msıkwolın folhe Armınoye yasire u bu videano, kımahwe u ruğzo wu cnufyo qaşyo dıkmisım calan Armınoye u sımle qroyto la mşale d’Azerbaijan, dımtabıq a qonune noşoye u dmakle u qedomo lo noşoyo dıkmisım cala folhe Armınoye.

Elo bu taşrorano, simiste a hayle Armınoye sturyo calu qedomathe la yasire d’Azerbaijan. Me gabo hreno, i Mşatasto da zedqe noşoye d’Suriya dıkmcaqbo u qrobo d’Suriya me Britania maglela, dhol 900 marhıbone d’Suriya dınqiliwo l’Azerbaijan leşan dımharbi mqabıl dan Armınoye b’Qarabax, daciri ucdo l’Suriya.

Turkiya thimowa dımşadarla ban alfayo ma marhıbonayda d’Suriya l’Azerbaijan leşan dımharbi cama hayle du rişqutno Aliyev, elo Ankara rfıdwola a idicatani. Elo hol 2.580 marhıbone d’Suriya mşadriwo lu snodo d’Baku u mani qtılwo 293 marhıbone bu qrobo mqabıl da hayle Armınoye b’Qarabax.

İ Mşatasto da zedqe noşoye makadlaste, di sagiyoyutho da marhıbonani dı daciri me Azerbaijan, rakiwi bı dukotho frişe du garbyo d’Suriya dkıtne kbişe me Turkiya beynothaye Afrin, Jarablus u Al Bab.