İ aykanoyutho hareyto du athro du Iraq

A grube mzayne dıkmısnodi mu İran, ba hçome dıksaymi cala hfite u gelyunore, naqla hreto mşarelın dxulqi bulbolo bu Iraq u dmahırwi i aykanoyutho di mşaynutho du athro.

Camgabıdathe, i şırke Amerikoyto d’Lokhed Martin dıksaymo u tacmiro da tayosyotho folhoye bi nuqazto d’Balad bu Iraq, mawdacla dımşarela dgurşo a falohayda mi nuqaztathe, l’celotho di mşaynutho.

Bu zabno dıkmqadım u cedono da guboye gawonoye du Iraq, a swikaste wu tehriwo di aykanoyutho di mşaynutho kızaydo ba şuşote dkowın bu Iraq. Ucdoste kmıntır dımdawmi a qatle wa hçome da soruhe, bnişo dmitahwiyo i şultonutho d’Mustafa Alkadhimi mhilto, u dmımte l’guboye msarhıbe udminaqe rişwazire hatho, dhowe qariwo la grube mzayne du İran.

Athmıl bıthır mıd şafıc 24 şoce calu qatlo du hfito İhab Alwazni b’Karbalaa, sim hçomo calu gelyunoro Ahmad Hasan me grub lo idico. Bu hçomo dsim calu gelyunoro qum du baytayde, mçarıh yaquro. Ba hfuxye dmahwın cala swikaste dımşarelın me hatho bu Iraq, u rişizgado du Huyodo d’Urifi bu Iraq Martin Hoth krıhle a hçomani dcala hfite ucala gelyunore. Hoth mawdacle da qatole knufqi mqabıl di şultonutho, kımhaddıdi u kfırsi i marıhbonutho bıgawe du kenşo u kmahırwi u maşıqlo folitiqoyo kule du athro.

Camgabıdathe, u rişono du gabo d’Altayyar Alsadri Muqtada Alsadır bi maqırhonutho dfrısle, mawdacle da swikaste qedomo da mhile’yo, u sımle qroyto li şultonutho dımqadmo a hayobe b’surhobo lu bethdino. Mxasra hreto, i şırke Amerikoyto d’Lokheed Martin mawdacla dımşarela ucdo dgurşo a falohayda dkıtne bi nuqazto folhoyto d’Balad bu Iraq. A falohe di şırkathe dıksaymi u tacmir da tayosyotho d’F-16 gıdmınqoli l’dukotho u athrawotho hrene l’celotho di mşaynutho.

Cali sbuthathe, mşalo Iraqoyo mawdacle di şırke d’Lokheed Martin kıtla 70 falohe bi nuqazto d’Balad, u 50 menaye gıdmitadcıri l’Amerika u 20 gıdmınqoli l’Arbil. Bebzabno, mşalo bi wazirutho du sutoro du Iraq mawdacle di şırke gıdgurşo a falohayda mi celtho da hçome dıkmisomi ba soruhe cali nuqazto d’Balad, u mathkarleste da falohani naqla hreto gıducri, i naqla d’qodır u Iraq dsoyım u garanti du sutorathe.