İ cito d’Mor Tuma Şliho da Suryoye Qatholiqoye d’Mawsal dıqla u noquşayda u hatho

İ cito d’Mor Tuma Şliho da Suryoye Qatholiqoye d’Mawsal, dıqla u noquşayda u hatho bıthır mıdşafıc şwac ışne calu nfolo d’Mawsal bidothıd du tukoso marıhbono dı Dacış.

Bu zawho du futoho du noquşo hatho di cito, u kohno di marcitho qaşişo Biyos Caffas sımle qroyto lu camaydan dıdocır m’hatho la botayde bı Mawsal.

Bıthır m’şalyutho dımdawamla şwac ışne, i cito d’Mor Tuma Şliho da Suryoye Qatholiqoye d’Mawsal, dıqla u noquşayda m’hatho. 18 bu yarhano b’zawho ruhonoyo dıxlit cama qole da hılhole, diq u noquşo di cito d’Mor Tuma bı Mawsal i catıqto dkıtyo i cito qamayto dıkmitarkawla noquşo hatho bıthır mu kboşo di mditho mu tukoso marıhbono dı Dacış bi şato da 2014. U noquşo di cito d’Mor Tuma diq mu kohno di marcitho qaşişo Biyos Caffas, ubi mıştawtfonutho d’kunoşo mu camaydan d’athın ma fenyotho mşahılfe d’Mawsal umi daşto d’N inwe.

U noquşo dkıtyo u yuqrayde 285 kilograme, snic bu athro d’Lebnon bu snodo momunoyo dımqadım mi mtakasto Franşoyto di Ahutho dlatyo masırto cam şultonutho, udkımcadro a’qalilwotho tawdithoye. U noquşo dınqil b’tayisto mi mditho d’Bayrut l’Boğdod, mşadır bıthır b’kamyon li mditho d’Mawsal.

Bu zawho du futoho du noquşo hatho di cito, u kohno di cito d’Mor Tuma qaşişo Biyos Caffas bi maqırhonutho dhule l’Frans 24 mırle “adyawma feshutho ğalabe rabthoyo laşanayna. Ukıtli sabro di feshuthathe dzaydo, lo balhude bu zabno dmıbnoyi a’citotho, elo bu zabno dmıbnoyi m’hatho a’nuqazyotho makthabzabnoye wa bote da mdinoye kulle d’Mawsal. U dyoqo du noquşo m’hatho, kobe işara l’yawme dıktıcni camruhaye sabro lu dactid, ukfıthi u darbo qum du dcoro da Mşihoye li mdithaththe i makthabzabnoyto”.

Camgabıdathe, qaşişo Caffas bi maqırhonutho dhule li sferyawmo d’Alşarqiya News, mawdacle du dyoqo da noquşe da citotho bı Mawsal, kmadıl da Mşihoye falqo mu cafrano ne, ubebzabno sımle qroyto lu camaydan dıdocır m’hatho la botayde bı Mawsal.

Bi şato da 2014, a’grube marıhbone dı Dacış mşahlafwolın i cito d’Mor Tuma Şliho da Suryoye Qatholiqoye d’Mawsal, l’bethdino ulı hbuşyo du tukoso marıhbono. W’ucdo bıthır mıdsımwo u hurorayda m’Dacış, kımdawmi a’fulhone du hethotho du benyono di cito d’Mor Tuma dıkdocır u makthabzabnayda lu doro da 19.